बेलायतमा हराइरहेका नेपाली विद्यार्थी सकुशल भेटिए

लन्डन । विगत आठ दिनदेखि बेलायतमा हराइरहेका एक नेपाली विद्यार्थी सचिन भट्टराई सकुशल भेटिएका छन् ।

बिस्टलमा उनी संगै बस्ने साथी स्पन्दन वाग्लेले आइतबार सचिन आफैं अनलाइन सम्पर्कमा आएको जानकारी दिए । सचिन आफू बस्ने ब्रिस्टलस्थित मार्स्टन रोडबाट हिंडेर करिब १० मिनेट टाढा भेटिएको वाग्लेले बताए । उनीहरु अहिले ब्रिस्टल प्रहरी कार्यालयमा छन् ।

उच्च शिक्षाका लागि करिब दुई महिनाअघिमात्र बेलायत आएका सचिन भट्टराईको खोजीमा सहयोग गरिदिन उनको परिवारले आग्रह गरेको थियो ।

युनिभर्सिटी अफ वेष्ट इंग्ल्यान्डमा एमबीए अध्ययनरत मोरङ सुन्दरहरैचा–७ गोठगाउँ घर भएका २४ वर्षीय सचिन भट्टराई विगत आठ दिन देखि सम्पर्कविहीन थिए ।

गत १६ नोभेम्बर शनिबार साँझ करिब सवा ८ बजेतिर काम सकेर निस्किएका उनी त्यसयता सम्पर्कमा नआएपछि उनको परिवारले लन्डनस्थित नेपाली दूतावास र यूकेको नेपाली समुदायसमक्ष खोजीका लागि अपिल गरेको थियो ।

सचिनले स्थानीय डोमिनोज पिज्जामा काम गर्दै आएका थिए ।

सो राती डेरामा नफर्केपछि उनी संगै बस्ने साथी स्पन्दन वाग्लेले आइतबार उनको परिवार र सोमबार प्रहरीलाई खबर गरेका थिए ।

गत सेप्टेम्बर २१ मा मात्रै लन्डन आएका सचिन दुई महिना हुन नपाउँदै बेपत्ता हुँदा परिवार चिन्तित थियो ।

उच्च शिक्षा हासिल गर्ने उद्देश्य लिएर दुई महिना पहिले मात्रै बेलायत पुगेको छोरा बेपत्ता भएको समाचार सुन्दा परिवार छाँगाबाट खसे जस्तो भएको सचिनका पिता शशीकान्त भट्टराईले बताएका थिए ।

लन्डनस्थित नेपाली दूतावासका कार्यवाहक राजदूत बिपिन दवाडीले पनि भट्टराईको वस्तुस्थिति पत्ता लगाउन दूतावासले सक्दो प्रयास गरिरहेको बताएका थिए ।