शिवसताक्षीमा ९५ वटा समुदायिक कुकुरलाई लगाइयो रेविजविरुद्धको खोप

शिवसताक्षी, ११ पुस । झापाको शिवसताक्षीमा ९५ वटा समुदायिक कुकुरलाई रेविजविरुद्धको खोप लगाइएको छ। शिवसताक्षी नगरपालिका–२ को पशु स्वास्थ्य केन्द्रमा रेविज विरुद्धको खोप र बध्याकरण कार्यक्रम सञ्चालन गरिएको हो ।

नगरपालिकाको ‘रेविज रोग नियन्त्रण अभियान’मार्फत सामुदायिक (छाडा छोडिएका) र घरमा पालिएका समेत ९५ कुकुरलाई बन्ध्याकरणसहित रेविजरोग विरुद्धको खोप लगाइएको हो । सामुदायिक कुकुरले मानिस तथा पशुचौपायलाई टोकेर घाइते बनाउनाका साथै रेविज रोगको संक्रमण बढाउने, ट्राफिक आवागमनमा असर पुर्याउने र बालबालिकामा त्रास फैलाउने घटना बढेपछि नियन्त्रणका लागि बन्धाकरण र खोप कार्यक्रम चलाइएको नगर प्रमुख मेगाहाङ्ग थोप्राले जानकारी दिए ।

रेविज एक घातक रोग हो जुन प्रायः कुकुरबाट मानिसमा सर्न सक्छ, त्यसैले यसलाई रोक्न खोप र बध्याकरण अत्यन्त महत्वपूर्ण रहेको उपप्रमुख नरमाया कार्कीले बताइन् । उनका अनुसार नगरपालिकाले विभिन्न स्थानहरुबाट कुकुरहरु भेला गरी खोपकेन्द्र सम्म प्रबन्धन मिलाएको थियो । उक्त अभियानमा पोथी कुकुरको बध्याकरण गरिएको र भाले कुकुरलाई रेविजरोग विरुद्धको खोप लगाइएको थियो । प्राविधिक सहयोग नेपाल एग्री लाइवस्टोक ट्रनिक एण्ड रिसर्च सेन्टर सुनसरीको रहेको थियो ।

रेविज विरुद्धको खोप र बन्धाकरण कार्यक्रम शिवसताक्षी नगरपालिका पशु सेवा शाखाले आयोजना गरेको थियो भने, कार्यक्रम भोलिसम्म चल्ने शिवसताक्षी नगरपालिकाले जनाएको छ।

The post शिवसताक्षीमा ९५ वटा समुदायिक कुकुरलाई लगाइयो रेविजविरुद्धको खोप appeared first on Jhapa Online.