फिफा वरीयतामा बेल्जियम खस्कियो : पोर्चुगल, नेदरल्यान्ड्स र जर्मनीको प्रगति

काठमाडौं । विश्व फुटबल महासंघ (फिफा)को वरीयतामा बेल्जियम खस्किँदा पोर्चुगल, नेदरल्यान्ड्स र जर्मनीले भने प्रगति गरेका छन् ।

फिफाले हालै सार्वजनिक गरेको नयाँ वरीयतामा सन् २०१८ को विश्वकपमा तेस्रो स्थान हासिल गरेको बेल्जियम दुई स्थान तल झरेको छ ।

भर्खरै सम्पन्न नेसन्स लिगका दुवै खेलमा बेल्जियम क्रमशः इटाली र इजरायलसँग पराजित भएको थियो । छेटौँ स्थानमा रहेको यससँगै आठौँमा झरेको छ ।

फिफा वरीयतामा पोर्चुगल, नेदरल्यान्ड्स र जर्मनीले एक–एक स्थान सुधार गरेका छन् ।

पोर्चुगल छैटौँ र नेदरल्यान्ड्स सातौँ स्थानमा उक्लिएका हुन् ।

यस्तै जर्मनीले पनि शीर्ष १० मा स्थान बनाएको छ । यसअघि ११ औँ स्थानमा रहेको जर्मनी १० औँमा उक्लिएको हो ।

फिफा वरीयतामा एक देखि पाँच स्थानसम्म यथावत छ । विश्वविजेता अर्जेन्टिना शीर्ष स्थानमा कायम छ । यसैगरी फ्रान्स दोस्रो, स्पेन तेस्रो, इंग्ल्यान्ड चौथो र ब्राजिल पाँचौ स्थानमा छन् ।

इटाली पनि नवौँ स्थानमा यथावत छ ।

यता नेपालले पनि एक स्थान सुधार गरेको छ । नयाँ वरीयतामा नेपाल एक स्थान सुधार गर्दै १७५ औँ स्थानमा रहेको छ ।

यसअघि नेपाल १७६ औँ स्थानमा थियो । यसै महिना भएको अन्तर्राष्ट्रिय मैत्रीपूर्ण खेलमा नेपालले अफगानिस्थानलाई २–० गोलअन्तरले हराएको थियो । यहीँबाट नेपालको वरीयता सुधार भएको हो ।

फिफा वरीयतामा नेपालको एक स्थान सुधार, भारत खस्कियो