नेपालमा निशुल्क आँखा शिविर चलाउन बेलायतमा ‘फन्ड रेइजिङ डिनर’

लन्डन- बेलायतवासी युवा सामाजिक अभियन्ता डा विशाल गुरुङले नेपालमा निशुल्क आँखा शिविरको दोस्रो संस्करण सञ्चालन गर्ने भएका छन् ।

सन् २०२३ मा स्यांग्जाको पुतलीबजारमा आँखा शिविर चलाएर ४ हजार बढी स्थानीयलाई निशुल्क सेवा दिएका उनले यस वर्ष पर्वत र सर्लाहीमा शिविरको तयारी गरेका छन् ।

डा गुरुङद्धारा स्थापित रेज अफ होप फाउन्डेसद्धारा आगामी फेब्रुअरी १० देखि १३ तारिखसम्म चार दिन पर्वत तथा फेब्रुअरी १८ देखि २० तारिखसम्म तीन दिन सर्लाहीमा शिविर सञ्चालन गरिनेछ ।

पर्वतमा चार दिनमध्ये पहिलो एक दिन चारभञ्ज्याङ तथा त्यसपछिका तीन दिन सदरमुकाम कुस्मामा शिविर रहनेछ ।

नेपाल नेत्रज्योति संघसंगको सहकार्यमा डा गुरुङले आँखा शिविर सञ्चालन गर्न लागेका हुन् । पर्वतको शिविरमा हिमालयन आँखा अस्पताल तथा सर्लाहीको शिविरमा भरतपुर आँखा अस्पतालबाट स्वास्थ्यकर्मीहरु खटिनेछन् ।

डा गुरुङका अनुसार गत वर्षको शिविरमा ४ हजार ४ सय ७० जनाको आँखा जाँच गरिएका थियो भने ९४ जनाको मोतीबिन्दुको शल्यक्रिया गराइएको थियो । यस वर्ष पनि हजारौंको आाख जाँच गरी पर्वतमा १ सय र सर्लाहीमा २ सय गरी तीन सय जनाको मोतीबिन्दुको शल्यक्रिया गराउने योजना छ।

यसैबीच, शिविरका लागि कोष संकलन गर्ने उद्धेश्यले यही जनवरी १७ तारिख शुक्रबार बेलुका अल्डरसटको एम्पायर ब्यांकेटिङमा फन्ड रेइजिङ डिनर आयोजना गरिंदैछ ।

डिनरमा सहभागिता तथा शिविरमा सहयोगका लागि बेलायतवासी सबै नेपालीसंग सहयोग आव्हान गर्दै डा गुरुङले भनेका छन् , नेपालका विपन्न समुदायहरुसम्म पुगेर उनीहरुको गुमेको आँखाको ज्योति फर्काउने कोशिस गर्दैछौं । हाम्रो सफलता तपाईहरुको उदारता र प्रदान सहयोगमा निर्भर रहनेछ ।

केही वर्षदेखि बेलायतमै कार्यरत डा गुरुङ सामाजिक क्षेत्रमा पनि निकै सक्रिय छन् । यहाँको सबैभन्दा ठूलो नेपाली संस्था तमुधिं यूकेका वर्तमान महासचिव उनी कञ्जरभेटिभ पार्टीमा आबद्ध रहेर बेलायतको स्थानीय राजनीतिमा समेत क्रियाशिल रहंदै आएका छन्।