यू–१७ का गोलकिपर भक्तले म्यानचेस्टर युनाइटेडमा चार दिन बिताउने

काठमाडौं । नेपाली यू–१७ राष्ट्रिय फुटबल टोलीका गोलकिपर भक्तबहादुर परियारले इंग्लिस क्लब म्यानचेस्टर युनाइटेडको भ्रमण गर्ने मौका पाएका छन् ।

’युनाइटेड वी प्ले’ कार्यक्रमका विजेता भएर भक्तले यो अवसर पाएका हुन् ।

म्यानचेस्टर युनाइटेडले ‘ग्रासरुट फुटबल इनिसिएटिभ’अन्तर्गत नेपाल फुटबल संघ (एन्फा)को प्राविधिक सहयोगमा यो परियोजना सञ्चालन गरेको हो । जसको वित्तीय सहयोग भने अपोलो टायरले गरेको छ ।

भक्तले म्यानचेस्टर युनाइटेड क्लबमा डिसेम्बर ५ देखि ८ सम्म चार दिन बिताउनेछन् । उनले युनाइटेडको म्याच–डे अनुभव, क्लबको सकर स्कूलकाप्रशिक्षकसँग प्रशिक्षण सत्र, र पूर्वखेलाडीहरूसँग अन्तरक्रिया गर्ने जस्ता गतिविधिहरूमा भाग लिनेछन् ।

यसैबीच एन्फाका अध्यक्ष पंकजविक्रम नेम्बाङले ’युनाइटेड वी प्ले’ कार्यक्रमका विजेता भक्तलाई हालै एक कार्यक्रमबीच बिदाइ गरे ।