साताव्यापी विवाह पञ्चमी महोत्सवअन्तर्गत ‘तिलकोत्सव’ विधि सम्पन्न

जनकपुरधाम । साताव्यापी सीताराम विवाह पञ्चमी महोत्सवको बुधबार चौथो दिन ‘तिलकोत्सव’ विधि सम्पन्न गरिएको छ ।

राम मन्दिरमा आयोजित कार्यक्रमबीच भगवान् श्रीरामलाई राजा जनकको प्रतिनिधित्व गर्दै जानकी मन्दिरका छोटा महन्त रामरोषण दास ‘वैष्णव’ले तिलक चढाए ।

मिथिलामा बेहुला र बेहुली एकअर्को पक्षलाई मन परेपछि तिलक चढाउने परम्परा छ । सोही परम्पराअनुरुप त्रेतायुगमा जस्तै आज भगवान श्रीरामलाई तिलक चढाइएको हो ।

अयोध्या अर्थात् राजा दशरथको भूमिकामा राम मन्दिरका महन्त राम गिरी र राजा जनकको प्रतिनिधित्व गरेका जानकी मन्दिरका छोटा महन्त दासले सम्धी मिलनसमेत गरेका छन् ।

मिथिला परम्पराअनुसार बेहुली र बेहुला पक्षका महिलाले एक अर्कालाई गीतमार्फत गाली दिने चलन छ । यहाँ पनि महिलाहरुले लोकगीतमार्फत् अयोध्याबाट आएका जन्तीलाई गाली गरेका छन् । तिलकोत्सवका लागि जानकी मन्दिरबाट करिब सयौं भार (कोसेली) राम मन्दिर लगिएको थियो ।

तिलकोत्सव समारोहमा अयोध्याबाट आएका जन्ती र हजारौं श्रद्धालु सहभागी थिए । विवाह पञ्चमी महोत्सवको पाँचौं दिन बिहीबार मटकोर र छैटौं दिन शुक्रबार विवाह (स्वयंवर) कार्यक्रम आयोजना गरिनेछ । शनिबार रामकलेवा गरी जन्ती एवं साधुसन्तलाई बिदा गरेपछि विवाह पञ्चमी विधिवत सम्पन्न हुन्छ ।