रविलाई भेट्न पूर्वप्रधानमन्त्री भट्टराई कास्की प्रहरीको कार्यालयमा

काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेलाई भेट्न पूर्वप्रधानमन्त्री डा बाबुराम भट्टराई जिल्ला प्रहरी कार्यालय कास्कीमा पुगेका छन् ।

नेपाल समाजवादी पार्टी (नयाँ शक्ति)का संयोजक भट्टराई पूर्वउपप्रधान तथा गृहमन्त्रीसमेत रहेका लामिछानेलाई भेट्न शुक्रबार बिहान पोखरास्थित कास्की प्रहरीको कार्यालय पुगेको रास्वपाका नेता दीपक बोहराले जानकारी दिए ।

सहकारी रकम अपचलन मुद्दाको अनुसन्धानका क्रममा पक्राउ परेका लामिछाने कात्तिक ३ देखि कास्की प्रहरीको हिरासतमा छन् । उनलाई बयानका लागि रुपन्देही, काठमाडौं र चितवन पनि लगिएको थियो । अब पर्सा लैजान बाँकी छ ।

पूर्वप्रधानमन्त्री भट्टराईले हिरासत बाहिरै राखेर लामिछानेमाथि अनुसन्धान गर्ने सकिनेमा जोड दिँदै आएका छन् ।