सबै खेल हारेको लुम्बिनी दबाबमा, लयमा रहेको जनकपुरलाई हराउनैपर्ने बाध्यता

काठमाडौं । नेपाल प्रिमियर लिग (एनपीएल) क्रिकेटमा आज (आइतबार) पनि दुई खेल हुँदैछन् । लिगको आठौं दिनको पहिलो खेलमा लुम्बिनी लायन्स र जनकपुर बोल्ट्सबीच प्रतिस्पर्धा हुनेछ ।

यो खेल कीर्तिपुरस्थित त्रिवि मैदानमा बिहान ९ बजे सुरु हुनेछ ।

लुम्बिनीको कप्तानी नेपाली राष्ट्रिय टोलीका कप्तान रोहित पौडेलले गर्दैछन् । जनकपुर राष्ट्रिय टोलीका नियमित सदस्य अनिल साहको कप्तानीमा रहेको छ ।

लुम्बिनीले तीन खेल्दा सबैमा हार ब्यहोरेको छ । पहिलो खेलमा विराटनगर किंग्ससँग हारेको लुम्बिनीले पोखरा एभेन्जर्स र सुदूरपश्चिम रोयल्सविरुद्धको खेल पनि गुमाएको थियो ।

यसर्थ आज उ जित्नैपर्ने दबाबबीच मैदानमा उत्रनेछ । आजको खेलमा जित हात नपारे लुम्बिनीको प्लेअफ सम्भावना कठिन बन्नेछ । तर आज लुम्बिनीलाई लयमा रहेको जनकपुरलाई हराउन त्यति सहज भने छैन ।

यता जनकपुर भने लगातार चौथो जित निकाल्दै प्लेअफ सम्भावना थप बलियो बनाउन चाहन्छ । यसअघि जनकपुरले विराटनगर, कर्णाली याक्स तथा पोखरालाई पराजित गरेको थियो ।

आजै हुने दोस्रो खेलमा सुदूरपश्चिम र चितवनबीच प्रतिस्पर्धा हुनेछ । यो खेल दिउँसो १ बजे सुरु हुनेछ ।