इसाखिलको अर्धशतकमा सुदूरपश्चिमलाई चितवनको १६५ रनको लक्ष्य

काठमाडौं । एनपीएलमा चितवन राइनोजले सुदूरपश्चिम रोयल्सलाई १६५ रनको लक्ष्य दिएको छ ।

चितवनले पूरै ओभर खेलेर ५ विकेटको क्षतिमा १६४ रन बनाएको हो ।

चितवनका लागि ओपनर हसन इसाखिलले अर्धशतकीय पारी खेले । उनले ५१ बलमा ६ चौका र ३ छक्का प्रहार गर्दै ६५ रन जोडे । रवि बोपाराले ३६ रन बनाए ।

कप्तान कुशल मल्लले १३ रन बनाउँदा विपिन रावलले १७ रन र सन्तोष कार्कीले ९ रनको योगदान गरे ।

सुदूरपश्चिमका स्कट कुग्गेलिजनले दुई तथा ब्राण्डन म्याकमुलन र सैफ जैबले १/१ विकेट लिए ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा टस जितेर चितवनले ब्याटिङ रोजेको हो ।