प्लेअफ सम्भावना कायमै राख्न जित्नैपर्ने दबाबबीच एक-अर्काविरुद्ध भिड्दै पोखरा र विराटनगर

काठमाडौं । कीर्तिपुरको त्रिवि मैदानमा जारी नेपाल प्रिमियर लिग (एनपीएल) क्रिकेटमा आज पनि २ खेल हुँदैछन् ।

पहिलो खेल बिहान ९ र दोस्रो खेल दिउँसो १ बजे हुनेछ ।

पहिलो खेलमा पोखरा एभेन्जर्स र विराटनगर किङ्स आमने–सामने हुँदैछन् ।

समान ४–४ खलेका पोखरा र विराटनगरले हालसम्म १–१ जित मात्र निकालेका छन् । यसर्थ यी २ टोली आज प्लेअफ सम्भावना कायमै राख्न शतप्रतिशत जितको खोजीका एक–अर्काविरुद्ध भिड्दैछन् ।

आजको खेलमा पराजित भएको खण्डमा दुवै टोलीलाई दोस्रो चरणमा जाने बाटो कठिन बन्दै जानेछ ।

पोखराको कप्तानी नेपाली राष्ट्रिय टोलीका ओपनिङ ब्याटर कुशल भुर्तेलले तथा विराटनगरको पूर्वकप्तान तथा लेग स्पिनर सन्दीप लामिछानेले गर्नेछन् ।

आजै हुने दोस्रो खेलमा काठमान्डु गुर्खाज र जनकपुर बोल्ट्स भिड्ने छन् ।