फ्रान्स : जेसेल पेलिको बलात्कार मुद्दामा पूर्वपतिसहित ५० जना दोषी

काठमाडौं । फ्रान्सको एक अदालतले जेसेल पेलिको बलात्कार मुद्दामा पूर्वपति डोमिनिक पेलिकोलाई २० वर्षको जेल सजाय सुनाएको छ ।

डोमिनिकमाथि आफ्नी श्रीमतीलाई निद्राको चक्की खुवाएर एक दशकसम्म बलात्कार गरेको आरोप लागेको थियो ।

यस मुद्दामा प्रहरीले ५० जनालाई अभियुक्त बनाएको थियो । जसमा पत्रकार, डीजे, फायर फाइटर, लरी चालक, सिपाही र सुरक्षा गार्डहरू थिए।

अदालतले एकपछि अर्को गरी सजाय सुनाएको छ । डोमिनिकलाई आफ्नी छोरी क्यारोलिन र बुहारी अरोर र सेलिनको अभद्र तस्वीर खिचाएकोमा पनि दोषी ठहर गरिएको छ ।

यस मामिलामा सह-आरोपी जीन-पियरे मार्चेललाई १२ वर्षको जेल सजाय सुनाइएको छ । तर, अभियोजकहरूले १७ वर्षको सजाय माग गरेका थिए।

मार्चेलमाथि आफ्नी श्रीमतीलाई पनि बलात्कार गरेको आरोप लागेको थियो । उनीमाथि श्रीमतीलाई लागुऔषध खुवाएको आरोप पनि लागेको थियो ।

मार्चेलले सुनुवाइका क्रममा स्वीकार गरे कि उनले डोमिनिकबाट सिके र आफ्नी श्रीमतीलाई पाँच वर्षसम्म ड्रग्स दिएर बलात्कार गरिरहे ।यसबाहेक उनले डोमिनिकलाई आफ्नी श्रीमतीलाई बलात्कार गर्न पनि लगाएको स्वीकारेका छन् ।

साथै, निर्माणकर्मी साइमन एमलाई ९ वर्ष, प्लम्बर अहमदलाई ८ वर्ष र अवकाशप्राप्त खेलकुद प्रशिक्षक जोसेफ सीलाई ३ वर्षको जेल सजाय तोकिएको छ ।

यद्यपी अभियोजन पक्षले मागेको भन्दा अदालतले सबै दोषीलाई कम सजाय दिएको छ । सजायविरुद्ध पुनरावेदन गर्न १० दिनको समय दिइएको छ ।

सबै दोषीलाई जेल पठाउनुअघि आफ्ना वकिलहरूसँग भेट्न दिइनेछ। यस मुद्दाको सुनुवाई सेप्टेम्बर २०२४ मा सुरु भएको थियो ।