योगेश भट्टराई भन्छन्– लेखा समिति सभापतिकी श्रीमती अदालतमा उपस्थित हुनुपर्छ

काठमाडौं । नेकपा (एमाले) का सांसद योगेश भट्टराईले प्रतिनिधि सभाको सार्वजनिक लेखा समितिका सभापति ऋषिकेश पोखरेलकी श्रीमती अन्जला कोइराला अदालतमा उपस्थित हुनुपर्ने बताएका छन् ।

सोमबारको सार्वजनिक लेखा समितिको बैठकमा बोल्दै एमाले सांसद भट्टराईले कोइराला अदालतमा उपस्थित हुनुपर्ने बताएका हुन् ।

मोरङ धनपालथानस्थित उमागौरी कृषि सहकारी ठगी प्रकरणमा जोडिएकी उनीविरूद्ध मुद्दा दायर भएको छ ।

पक्राउ पुर्जी जारी भए पनि फरार छिन् । त्यस विषयलाई लक्षित गर्दै एमाले सांसद भट्टराईले अदालतमा उपस्थित हुन आग्रह गरेका हुन् ।

कोइरालासहित २५ जनाविरुद्ध गत पुस २ गते जिल्ला अदालत मोरङबाट पक्राउ पुर्जी जारी भएको थियो ।

भट्टराईले समिति सभापति पोखरेललाई लक्षित गर्दै भने, ‘समितिका सभापतिको श्रीमती फरार रहेको कुरा आइरहेका छन् । अदालतमा उपस्थित हुन राम्रो हुन्छ । यो समिति सुशासन र चेक एण्ड ब्यालेन्सका लागि पनि बनेकोले आर्थिक रूपमा प्रस्ट हुनुपर्छ । यो स्पष्टीकरण दिने फोरम त होइन तर यसबारे प्रस्ट बनाइदिनुस् ।’

उनले सहकारीमा जोडिएकी पोखरेल अदालत उपस्थित हुनुपर्नेमा पनि जोड दिए ।

‘अरू चिच्याउँदै हिँडे भनेर हामीले त्यसो गर्ने होइन, न्यायिक निरूपण हुने निकायमा जानुपर्छ, उहाँ पक्कै अदालतमा उपस्थित हुनुहुन्छ,’ उनले भने।

लेखा समिति सभापति पोखरेल नेकपा (एमाले) का सांसद हुन्।