चोरीको मोटरसाइकलसहित एकजना  पक्राउ

रौतहट।

चोरीको मोटरसाइकलसहित एकजना मानिसलाई प्रहरीले पक्राउ गरेको छ। पक्राउ पर्नेमा चन्द्रपुर नगरपालिका १० का  नेमी चौधरीको छोरा  १९ वर्षीय आयुष चौधरी रहेको जिल्ला प्रहरी प्रवक्ता डीएसपी दीपक कुमार रायले बताएका छन्। 

चन्द्रपुर  ९ सिंधुरेघारी स्थित स्थानीय रामकाजी गुरुङले गत १ गते राती आफ्नै घर आङगनमा पार्किङ गरी राखेको रोयल इन्फिल्ड कम्पनीको बा ८२ प ९६२६ नम्बरको बुलेट मोटरसाइकल चोरी भएको थियो।

पीडितको उजुरीको आधारमा  इलाका प्रहरी कार्यालय चन्द्रनिगाहपुरबाट  गएको प्रहरी टोलीले खोज तलास गर्दै जाने क्रममा गत ५ गते  वडा १० स्थितमा रहेको छट्टु चौधरीको बाँसघारी भित्र रहेको झाडीमा लुकाई  राखेको अवस्थामा मोटरसाइकल  बरामद गरेको डिएसपी राजकुमार राईले बताएका छन्।

मोटरसाईकलसंगै आरोपी आयुष चौधरीलाई  पक्राउ गरी म्याद थप भई अनुसन्धान कार्य भइरहेको जिल्ला प्रहरी कार्यालय रौतहटको सूचनामा उल्लेख गरिएको छ।

पछिल्लो समय इलाका प्रहरी कार्यालय चन्द्रिगाहपुरले मोटरसाइकल चोरीको घटना र लागुऔषध कारोवार नियन्त्रणमा तीव्रता दिएको छ।

-सञ्जय मिश्रा