सेनापति जमानलाई हटाउने प्रयास, बङ्गलादेशी सेनाले भन्यो – आधारहीन

काठमाडौं । बङ्गलादेश सेना भित्रको कथित द्वन्द्वसँग सम्बन्धित एक रिपोर्ट भारतको अङ्ग्रेजी पत्रिका इकोनोमिक टाइम्सले प्रकाशित गरेको छ ।

प्रतिवेदनमा दाबी गरिएको छ, “पाकिस्तान र बङ्गलादेश सेनामा जमात-ए-इस्लामी समर्थित लेफ्टिनेन्ट जनरल फैजुर रहमानले अन्य जनरलहरूको समर्थनमा वर्तमान बङ्गलादेश सेना प्रमुख जनरल वकार-उज-जमानलाई हटाउने प्रयास गरेका थिए, तर पर्याप्त समर्थनको अभावमा असफल भए ।”

अब बङ्गलादेश सेनाले यो प्रतिवेदनलाई अस्वीकार गरेको छ । र, यो पूर्णतया आधारहीन भएको बताएको छ । मङ्गलबार राति बङ्गलादेशको अन्तर सेवा जनसम्पर्क निर्देशनालय (ISPR) ले यस रिपोर्टप्रति चिन्ता व्यक्त गर्दै विरोध जनाएको छ ।

आईएसपीआरले भन्यो, “बङ्गलादेश सेनाले भारतका केही मिडिया आउटलेटहरूमा आधारहीन रिपोर्टहरू देखेको छ । यो प्रतिवेदनले सेना भित्रै सम्भावित विद्रोहको दाबी गरेको छ । यो रिपोर्ट पूर्णतया आधारहीन छ र बङ्गलादेशलाई अस्थिर बनाउन गलत सूचना फैलाउने उद्देश्यले जानाजानी प्रकाशित गरिएको छ । वर्तमान सेना प्रमुखको नेतृत्वमा बङ्गलादेश सेना दृढतापूर्वक एकताबद्ध र आफ्नो संवैधानिक दायित्वहरूप्रति प्रतिबद्ध छ ।”

इकोनोमिक टाइम्सले आफ्नो रिपोर्टमा लेखेको थियो, “लेफ्टिनेन्ट जनरल रहमानलाई बङ्गलादेश सैन्य गुप्तचर डीजीएफआईले निगरानीमा राखेको छ ।”

बङ्गलादेशका पर्यवेक्षकहरूले अवस्था तनावपूर्ण रहेको बताएका छन् । आगामी केही दिनमा बङ्गलादेशमा ठूलो उथलपुथल आउन सक्ने चेतावनी दिइएको छ ।

“हालै लेफ्टिनेन्ट जनरलले बङ्गलादेश सेनाको मुख्यालयमा एक बैठक बोलाएका थिए र त्यसमा आफ्नो शक्ति मापन गर्ने प्रयास गरेका थिए ।” यस बैठकको उद्देश्य बङ्गलादेशमा राजनीतिक अस्थिरताका बीचमा सैन्य विद्रोह गर्नु थियो । तर, यस बैठकमा वरिष्ठ अधिकारीहरूको उपस्थिति धेरै कम थियो ।” रिपोर्टमा उल्लेख छ ।

बङ्गलादेश सेनाले अस्वीकार गर्‍यो प्रतिवेदन

इकोनोमिक टाइम्सको रिपोर्टअनुसार, “यस षड्यन्त्रमा धेरै बङ्गलादेशी सेनाका अधिकारीहरू संलग्न रहेको आरोप छ । यसमा जनरल अफिसर्स कमान्डिङ (जीओसी) का १० जना अधिकारीहरूको नाम देखा परेको छ । यसमा मेजर जनरल मीर मुशफिकुर रहमान पनि पर्छन्, जो २४औं पैदल सेना डिभिजनका जीओसी हुन् र चटगाउँका क्षेत्र कमाण्डर हुन् ।”

रहमान लेफ्टिनेन्ट जनरलको पदमा पदोन्नति चाहन्छन् । यसबाहेक मेजर जनरल अबुल हसनत मोहम्मद तारिक पनि छन्, जो ३३ इन्फन्ट्रीका जीओसी हुन् । तिनीहरू सबै जनरल रहमानलाई समर्थन गरिरहेका छन् ।”

इकोनोमिक टाइम्सले आफ्नो रिपोर्टमा लेखेको छ, “बङ्गलादेशका वर्तमान सेना प्रमुख जनरल वकारलाई वैचारिक रूपमा मध्यमार्गी मानिन्छ ।उनीहरूलाई भारत समर्थक मानिन्छ र बङ्गलादेशको इस्लामिक बहुल सरकारको विरोध गर्दै आएका छन् ।”

“जनरल वकारले शेख हसिना सुरक्षित रूपमा भारत पुग्ने कुरा सुनिश्चित गरेका थिए ।” गत वर्ष अगस्ट ५ मा, इस्लामिक दलहरूको नेतृत्वमा एक भीड हसिनाको निवासमा पुगेको थियो ।

हालै जनरल वकारले बङ्गलादेशमा कानून व्यवस्था कायम राख्न सेनाले ठूलो भूमिका खेल्न सक्ने सङ्केत गरेका थिए ।

इकोनोमिक टाइम्सको यी दाबीमा बङ्गलादेश सेनाले भनेको छ, “इकोनोमिक टाइम्सले निरन्तर यस्तो गलत सूचना फैलाइरहेको छ भन्ने कुरा हाम्रो लागि चिन्ताको विषय हो । बङ्गलादेश सेनामा कुनै पनि प्रकारको आन्तरिक कलह छैन ।”