नि:शुल्क निःसन्तान परामर्श

चरिकोट ।

एचपिएन यूके र एचपिएन नेपालको आयोजना तथा च्छो –रोल्पा जनरल अस्पताल चरिकोटको सहकार्यमा ‘भर्खर जन्मेका बच्चा र सुत्केरी पछि आमाको स्वास्थ्य परिक्षण’ सम्बन्धि दुई दिने तालिम सम्पन्न भएको छ ।

तालिममा विभिन्न स्वास्थ्य संस्थामा कार्यरत १० जना स्वास्थ्यकर्मीहरुको सहभागिता रहेको थियो । नवजात शिशु तथा एक वर्ष मुनिका बालबालिकाहरुको जटिल रोग पहिचान गर्ने उद्देश्यले सञ्चालन गरिएको तालिममा नवजात शिशुको स्याहार र सुत्केरी पछि आमाको स्यहारमा स्वास्थ्यकर्मीको सहयोग लगायतको विषयमा प्रशिक्षण दिईएको थियो ।

तालिमका सहभागीहरुलाई एचपिएन यूकेका डाक्टर मिलिना, च्छो –रोल्पा जनरल अस्पतालका मेडिकल डाइरेक्टर डक्टर विनोद दंगाल, डक्टर सतिश निरौला, स्वास्थ्य कार्यालय दोलखाका प्रमुख उत्तमराज खनाल लगायतले प्रशिक्षण दिनुभएको थियो ।

यसैबीच सदरमुकाम चरिकोटमा रहेको च्छो –रोल्पा जनरल अस्पतालबाट २५ जनाले निशुल्क निःसन्तान परार्मश सेवा लिएका छन् । अस्पतालमा सञ्चालन भएको शिविरमा २५ जनाले सेवा लिएको मेडिकल डाइरेक्टर डक्टर विनोद दंगालले बताउनु भयो ।

इन्दिरा आइभिएफको बाँझोपन विशेषज्ञ डाक्टर नेहा हुमागाईँले निःसन्तान सम्बन्धि निशुल्क परार्मश सेवा दिनुभएको थियो । बाँझोपनको समस्या महिला र पुरुषमा समान रुपमा हुने उहाँले बताउनुभयो ।

डा. नेहाका अनुसार कुनै कारणवस दम्पतीसंगै बस्न नपाउँदा, बढीमात्रामा धुम्रपान, रक्सी, सुर्ती सेवन गर्दा र विवाह तथा सन्तान योजनामा ढिलाई गर्दा उक्त समस्या देखिन्छ । यो समस्या समाधानको लागि दम्पती दुवैजनाको स्वास्थ्य परिक्षण र उपचार जरुरी रहेको उहाँले बताउनुभयो ।
चिरञ्जीवी मास्के÷दोलखा