भारतीय राजदूतावासले मनायो ६० औं आइटेक दिवस (तस्वीरहरु)

काठमाडौं । काठमाडौंस्थित भारतीय राजदूतावासले ६० औं भारतीय प्राविधिक तथा आर्थिक सहकार्य (आइटेक) दिवस मनाएको छ। कार्यक्रममा परराष्ट्रमन्त्री डा. आरजु राणा देउवा प्रमुख अतिथिको रूपमा सहभागी भइन्।

आइटेक भारत सरकारको विदेश मन्त्रालयको क्षमता निर्माण कार्यक्रम हो, जसले १६० भन्दा बढी देशका २ लाखभन्दा बढी अधिकारीहरूलाई तालिम दिएको छ।

कार्यक्रममा महान्यायाधिवक्ता रमेश बडाल, सहायक रथी पवन खत्री र सशस्त्र प्रहरी उपरीक्षक दयाराम शर्माले आइटेकका बारेमा आफ्ना अनुभव सुनाए। कार्यक्रममा भारतीय सांस्कृतिक समूह ‘यज्ञ’ ले मयूरभञ्ज छाऊ नृत्य र कान्त दब दब ब्यान्डले लोक फ्युजन र ज्याज प्रस्तुत गरेका थिए।

परराष्ट्रमन्त्री देउवाले भारतमा अध्ययन गर्दाको अनुभव सुनाउँदै सहयोगका लागि भारत सरकारलाई धन्यवाद दिइन्। भारतीय राजदूत नवीन श्रीवास्तवले आइटेक कार्यक्रमलाई थप विस्तार गर्ने प्रतिबद्धता व्यक्त गरे।

सन् २०२४–२०२५ मा नेपालका ५१० जनालाई भारतका विभिन्न संस्थानमा तालिम दिइएको छ। २१ जना इन्जिनियरलाई आईआईटी रुडकीमा जलस्रोत व्यवस्थापनमा एम.टेक पढाइएको छ। डाक्टर, सरकारी वकिल, न्यायाधीश, प्रहरी, सशस्त्र प्रहरी र खानेपानी मन्त्रालयका कर्मचारीका लागि विशेष तालिमको व्यवस्था गरिएको छ।

नेपाल भारतको आइटेक कार्यक्रममा सक्रिय साझेदार हो। विगत १५ वर्षमा ३ हजारभन्दा बढी नेपाली अधिकारीहरूले यस कार्यक्रमबाट तालिम लिएका छन्।