संसद् बैठक आधा घण्टा स्थगित

काठमाडौं । प्रतिनिधि सभाको बैठक आधा घण्टाका लागि स्थगित भएको छ । प्रतिपक्षी बेञ्चले विद्युत् प्राधिकरणका कार्यकारी निर्देशकबाट कुलमान घिसिङलाई बर्खास्त गर्ने सरकारको निर्णयमा प्रधानमन्त्री केपी शर्मा ओलीले जवाफ नदिएसम्म बैठक सञ्चालन गर्न नदिने अडान लिएपछि बैठक आधा घण्टाका लागि स्थगित भएका हो ।

बैठक स्थगितको सूचना दिँदै सभामुख घिमिरेले भने,’सिङ्गो प्रतिपक्षी दलले उठेर विरोध जनाउँदा बैठक सञ्चालन गर्न सम्भव पनि हुँदैन, सञ्चालन गर्न पनि सकिँदैन । त्यसैले यो बैठक आधा घण्टाको लागि स्थगित हुन्छ।’

प्रतिनिधि सभाको बैठकमा सरकारले दुई तिहाइको दम्भ देखाउँदै कुशल राष्ट्रसेवकलाई बर्खास्त गरेको भन्दै विरोध गरिएको थियो । सभामुख देवराज घिमिरेले बैठक सञ्चालनको वातावरण बनाउन पटक-पटक ध्यानाकर्षण गराउँदा समेत प्रतिपक्षी बेञ्चले उठेर विरोध जारी राखेपछि बैठक अघि बढ्न नसकेको हो ।