इटहरीको सेन्ट्रल प्लाजाबाट सात जनाको उद्धार, हेलिकोप्टर पठाउने तयारी

सुनसरी । इटहरी चोकस्थित सेन्ट्रल प्लाजामा बुधबार बिहान साढे ९ बजेदेखि लागेको आगोलाई नियन्त्रणमा ल्याउने प्रयास जारी छ ।

इलाका प्रहरी कार्यालय इटहरीका अनुसार हालसम्म सात जनाको उद्धार गरिएको छ भने केही मानिस अझै पनि भवनमा फसेका छन् ।

९ तलाको प्लाजामा पाँचौं तलाबाट आगलागी सुरु भएको थियो । हाल पाँचौं, छैटौं र सातौं तलासम्म आगलागी फैलिएको छ । भवनमा होटेल वरन्डा, रेस्टुरेन्ट, सिनेमा हल, बैङ्क, क्याफे र विभिन्न पसलहरू छन् ।

इटहरी-६ का वडाध्यक्ष दिवस पोखरेलका अनुसार भवनभित्र प्रवेश गर्न असम्भव भएकाले बाहिरबाट मात्र आगो निभाउने प्रयास भइरहेको छ ।

गृहमन्त्री रमेश लेखकको समन्वयमा नेपाली सेनाको हेलिकोप्टर फसेका मानिसहरूको उद्धारका लागि आउँदै गरेको पोख्रेलले बताए ।

घटनास्थलमा नेपाल प्रहरी, सशस्त्र प्रहरी र नेपाली सेनाको संयुक्त टोली परिचालित छ । सशस्त्र प्रहरी बलको नम्बर १ बराह बाहिनीबाट १०५ जना सुरक्षाकर्मी खटिएका छन् ।