कनकाईमा न्याय सम्पादन सहज र सरल बन्दै

झापा, २२ चैत । कुनै समय थियो जतिबेला झापाको कनकाई नगरपालिकाको न्यायिक समितिलाई मुद्दा मिलाउन भ्याइनभ्याइ हुन्थो । एकै वर्षमा चार सयसम्म मुद्दाको चापले न्यायिक समिति व्यस्त हुन्थ्यो । तर, अहिले १२ वटामा झरेको छ । अहिले मुद्दाको चाप घटेको छ भने न्याय सम्पादन अझ सहज र सरल बन्दै गएको छ ।

कनकाई नगरपालिकाको वडामा मेलमिलाप समिति सक्रिय भएसँगै नगरको न्यायिक समितिमा मुद्दा चाप घटेको हो भने न्याय सम्पादन सहज र सरल बनेको हो । “वडाका मेलमिलापकर्तालाई तालिम दिएर अब्बल बनाएका छौं”, नगरपालिकाकी उपप्रमुख एवम् न्यायिक समिति संयोजक आशा शर्मा शिवाकोटीले भन्नुभयो, “जसले गर्दा वडामै विवाद मिल्न थालेको छ, नगरसम्म आउनुपर्ने बाध्यता हटेको छ ।”

न्याय माग्न आउने नगरबासीलाई आर्थिक बोझ घटेको उहाँले सुनाउनुभयो । “९ नम्बर वडाबाट टेम्पोमा आउँदा दुई सय जाँदा दुई सय लाग्छ”, उहाँले भन्नुभयो, “वडामै विवाद मिल्दा आर्थिक अवस्था कमजोर भएका वडाबासीलाई सहज भएको छ ।”

चालू आर्थिक वर्ष २०८१÷०८२ को हालसम्म १२ वटा नयाँ मुद्दा नगरको न्यायिक समितिमा दर्ता भएका छन् भने गत आर्थिक वर्ष २०८०÷०८१ को पाँच वटा सरी आएको थियो । नयाँ पुरा गरी १४ वटा मुद्दा फस्यौट भएको गरिएको छ ।

नगरमा दर्ता हुने मुद्दा अधिकांश मुद्दा लेनदेन र जग्गा विवादको रहेका छन् । न्यायिक समितिमा दर्ता भएका सात वटा लेनदेनका मुद्दामध्ये पाँच वटा फस्यौट भएका छन् भने दुई वटा फस्यौट हुन सकेको छैन ।

“आफन्तभित्रै लेनदेनको मुद्दा धेरै छ”, उहाँले भन्नुभयो, “नगरमा ऐलानी जग्गा धेरै भएकाले पनि सीमा विवाद धेरै आउने गरेको छ ।”

हरेक साताको बिहीबार र शुक्रबार न्यायिक समितिले इजलासमा मुद्दा हेर्ने गरिएको छ । गत दुई सातादेखि न्यायिक समितिमा नयाँ मुद्दा दर्ता भएका छैनन् । मुद्दा नभएको समयमा वडामा गएर मेलमिलाप समितिको अनुगमन गर्ने गरिएको उपप्रमुख शिवाकोटीले बताउनुभयो ।

न्यायिक समितिले मुद्दा हेर्दा राजनीतिक दबाब, नातावाद, कृपावाद नहेरी स्वतन्त्र रुपमा न्याय सम्पादन गर्ने गरेको उहाँले सुनाउनुभयो । “अप्ठ्यारा खाल र न्यायिक समितिबाट नसक्ने खालका मुद्दा आए अदालतमा पठाउने गरेका छौं”, उहाँले भन्नुभयो ।

मेलमिलाप समितिलाई वर्ष दुई पटक तालिम दिनुका साथै मेलमिलाप समितिलाई चुस्त दुरुस्त बनाउन अन्य पालिकाहरुले गरेका राम्रा कामको अनुगमन गराएर अभ्यास गराउने गरिएको न्यायिक समितिका कानून अधिकृत भूपेन्द्र बस्नेलले बताउनुभयो ।

गत आव २०८०÷०८१ मा न्यायिक समितिमा २४ वटा मुद्दा दर्ता भएकोमा १९ वटा फस्र्यौट भएको उहाँले बताउनुभयो । कनकाई नगरपालिका–३, ५ र ८ नम्बर वडाबाट मुद्दा धेरै आउने गरेका उहाँले बताउनुभयो ।

नगरमा उपप्रमुख शिवाकोटी, वडाध्यक्ष बलराम राई र कार्यपालिका सदस्य नवलकिशोर दत्तसहित तीन सदस्यीय न्यायिक समितिले न्याय सम्पादन गर्दै आएको छ भने प्रत्येक वडामा वडा सदस्यको संयोजकत्वमा मेलमिलाप केन्द्र गठन गरेर ‘वीन–वीन’ माध्यमबाट विवाद समाधान गरिँदै आएको छ ।

The post कनकाईमा न्याय सम्पादन सहज र सरल बन्दै appeared first on Jhapa Online.