गर्भावस्थामा यौन सम्बन्धबारे दम्पतीले जान्नैपर्ने कुरा

काठमाडौं । गर्भावस्थामा यौन सम्बन्ध राख्नु उपयुक्त हो कि होइन ? यस प्रश्नमा दम्पतीहरूको मनमा सङ्कोच हुनुका साथै समाजमा पनि विभिन्न प्रकारका गलत धारणाहरू फैलिएका छन् ।

आउनुहोस्, चिकित्सा विज्ञान के भन्छ र भावनात्मक तथ्यहरू के हुन् भन्नेबारे जानौँ ‍-

चिकित्सा विज्ञानका अनुसार यदि गर्भावस्था सामान्य छ भने यौन सम्बन्ध पूर्णरूपमा सुरक्षित हुनसक्छ । बच्चा आमाको गर्भमा एम्नियोटिक फ्लुइड् र पाठेघर बलियो तहद्वारा सुरक्षित छ भने सामान्यतया यौन सम्बन्धले कुनै हानि पुर्‍याउँदैन । अर्थात् गर्भमा रहेको बच्चा आमाको कोख, बलियो मांसपेशीहरू र एम्नियोटिक फ्लुइड्को एक तहद्वारा राम्रोसँग सुरक्षित रहन्छ ।

साथै, पाठेघरको ग्रीवा एक म्युकस प्लगद्वारा सील गरिएको हुन्छ, जसले ब्याक्टेरिया र सङ्क्रमणबाट सुरक्षा दिन्छ । अर्थात् यदि कुनै जटिलता छैन भने यौन सम्बन्धले गर्भमा रहेको बच्चालाई कुनै हानि पुर्‍याउँदैन।

गर्भावस्थामा यौन सम्बन्धबाट कहिले बच्ने ?

प्लेसेन्टा प्रीविया

जब प्लेसेन्टा गर्भाशयको मुख (सर्भिक्स) ढाकिरहेको हुन्छ, यस्तो अवस्थामा यौन सम्बन्धले रक्तस्राव गराउन सक्छ ।

समयभन्दा अगाडि डेलिभरी हुने खतरा भएमा

यदि पहिले पनि बच्चा चाँडै जन्मिएको थियो भने यौन सम्बन्ध राख्दा पाठेघरलाई उत्तेजित गर्न सक्ने भएकाले जोखिम बढ्न सक्छ ।

गर्भावस्थामा बारम्बार रक्तस्राव हुने भएमा

निरन्तर रक्तस्राव भइरहेमा यौन सम्बन्ध सुरक्षित हुँदैन । यस्तो अवस्थामा थप रक्तस्राव वा जटिलता आउन सक्छ ।

एम्नियोटिक फ्लुइड् चुहिनु (पानीको थैलो फुट्नु)

पानीको थैली फुटिसकेपछि यौन सम्पर्क गर्दा सङ्क्रमणको उच्च जोखिम हुन्छ ।

बहु गर्भावस्था (जुम्ल्याहा वा बढी बच्चा भएको अवस्थामा)

यस्ता अवस्थामा पाठेघरमा बढी दबाब र तनाव हुने भएकाले विशेष सावधानी आवश्यक पर्छ ।

पहिलेको गर्भपतन वा गम्भीर जटिलता भएको इतिहास

यदि अघिल्लो गर्भमा गर्भपतन वा अन्य स्वास्थ्य समस्या देखिएको हो भने यौन सम्बन्ध नगर्न चिकित्सकले सुझाव दिन्छन् ।

फाइदा

यदि महिलालाई कुनै समस्या छैन र चिकित्सकले निषेध गरेका छैनन् भने पार्टनरसँग रहनाले भावनात्मक सम्बन्ध बढ्छ । यस समयमा महिलालाई पार्टनरको निकटता र माया धेरै आवश्यक हुन्छ । यसले हर्मोनहरूलाई रिल्याक्स गर्दछ, जसले तनाव कम गर्दछ ।

अर्गाज्मपछि शरीर र दिमाग शान्त हुन्छ । रक्तसञ्चार सुधारिन्छ, जसले आमा र बच्चा दुवैलाई फाइदा पुर्‍याउँछ ।

कस्ता कुरामा ध्यान दिनुपर्छ ?

• पोजिसन सावधानीपूर्वक छनोट गर्नुहोस् । पेटमा दबाब पार्ने पोजिसन नअपनाउनुहोस् ।
• स्वच्छताको ख्याल राख्नुहोस्, सरसफाइले सङ्क्रमणको जोखिम कम गर्छ ।
• कन्डमको प्रयोग गर्नुहोस् ।
• यदि दुखाइ, रक्तस्राव वा असहजता महसुस हुन्छ भने यौन सम्बन्ध तुरुन्त रोक्नुहोस् र चिकित्सकलाई भेट्नुहोस् ।