बस दुर्घटनामा ३ जनाको मृत्यु

कोकिला भण्डारी
धनकुटा, २३ वैशाख । धनकुटाको जिरोप्वाइन्ट नजिकैको गोलाईमा बस दुर्घटना परेर मृत्यु हुनेको सङ्ख्या तीन पुगेको छ ।

धनकुटा नगरपालिका–६ गोठगाँउस्थित कोशी लोकमार्गमा धरानबाट भोजपुरतर्फ जाँदै गरेको यात्रुबाहक बस सडकबाट झण्डै ५० मिटर तल खसेको थियो । सो दुर्घटनामा परी गम्भीर घाइते हुनुभएका बस चालक सुनसरीको धरान १३ का ५१ वर्षीय रुद्र तामाङको उपचारका क्रममा मृत्यु भएको छ ।

त्यस्तै, भोजपुर षडानन्द नगरपालिका १३ का अर्का घाइते वर्ष ५८ का लिलाबहादुर श्रेष्ठको पनि उपचारको क्रममा विपि कोइराला स्वास्थ्य विज्ञान प्रतिष्ठान धरानमा मृत्यु भएको छ ।

सो दुर्घटनामा परी धनकुटा नगरपालिका–६ बस्ने ७३ वर्षीया कृष्णकुमारी राई भुजेलको उपचारको क्रममा धनकुटा अस्पतालमा मृत्यु भएको थियो । हालसम्म मृत्यु हुनेको सङ्ख्या तीन पुगेको जिल्ला प्रहरी कार्यालय धनकुटाका डिएसपी ओम प्रकास खनालले जानकारी दिनुभयो ।

सोमबार धरानबाट धनकुटा आउँदै गरेको १ ख। २१७७ नम्बरको बस धनकुटाको गोठगाउँमा दुर्घटना भएको थियो । दुर्घटनामा परी १४ जना घाइते भएका छन् । सो दुर्घटनामा परी घाइते भएका अन्य घाइतेहरूको धरानस्थित विपी कोइराला स्वास्थ्य विज्ञान प्रतिष्ठानमा उपचार भइरहेको छ ।

The post बस दुर्घटनामा ३ जनाको मृत्यु appeared first on Jhapa Online.