रचेल गुप्ताले किन त्यागिन् मिस ग्रान्ड इन्टरनेशनलको ताज ?

काठमाडौं । मिस ग्रान्ड इन्टरनेशनल २०२४ को ताज जितेकी भारतीय मोडल रचेल गुप्ताले आफ्नो ताज त्यागेकी छिन् । उनले सामाजिक सञ्जालमार्फत विभिन्न कारणहरूको उल्लेख गर्दै राजीनामा दिएकी हुन्, जसले अन्तर्राष्ट्रिय सौन्दर्य प्रतियोगिताको भित्री संरचना र व्यवस्थापनमाथि गम्भीर प्रश्न उठाएको छ ।

को हुन् रचेल गुप्ता ?

२१ वर्षीया रचेल गुप्ताको जन्म २००४ जनवरी २३ मा भारतको पन्जाब राज्यको पटियालामा भएको थियो । उनका बुबा राजेश अग्रवाल र आमा जेनिफर गुप्ता व्यापारिक क्षेत्रमा आबद्ध छिन् । उनकी कान्छी बहिनी रिया पनि छिन् । रचेलले मुम्बई विश्वविद्यालयबाट मनोविज्ञानमा अध्ययन गरेकी हुन् ।

१८ वर्षको उमेरमै उनले मिस सुपर ट्यालेन्ट अफ द वर्ल्ड २०२२ जितेर अन्तर्राष्ट्रिय मान्यता कमाएकी थिइन् । त्यसपछि २०२४ अक्टोबर २५ मा थाइल्यान्डको बैंककमा आयोजित भव्य समारोहमा उनले मिस ग्रान्ड इन्टरनेशनल २०२४ को ताज जितेर इतिहास बनाएकी थिइन् । उनी यो प्रतियोगिता जित्ने पहिलो भारतीय महिला हुन् । तर ताज जितेपछि सुरु भएको अनुभव भने एकदमै पीडादायक रहेको उनले दाबी गरेकी छिन् ।

रचेलका आरोप

उनले आफ्नो युट्युबमा भिडिओ र इन्स्टाग्राम पोस्टमार्फत मिस ग्रान्ड इन्टरनेशनल संस्था गरेको व्यवहारको बारेमा खुलासा गरेकी छिन् । उनका अनुसार सुरुवातमा उनलाई अत्यन्तै सानो होटेल कोठामा राखिएको थियो, जहाँ आफ्ना सामान राख्ने ठाउँसमेत थिएन ।

त्यसपछि उनलाई सहर भन्दा झन्डै २ घण्टा टाढा एकान्त घरमा सारिएको थियो, जहाँ खानपान र कपडाको सम्पूर्ण खर्च उनलाई आफैँले बेहोर्नुपरेको थियो ।

उनले पहिलो महिना मात्रै केही रकम पाएकी थिइन्, त्यसपछि आफ्नै परिवारमा आर्थिक रूपमा निर्भर हुनुपरेको थियो ।
यति मात्र होइन, उनले संस्थाका एक प्रतिनिधिले शारीरिक उत्पीडन र असभ्य व्यवहार गरेको गम्भीर आरोपसमेत लगाएकी छिन् ।

ती व्यक्तिले उनको शरीरमा नकारात्मक टिप्पणी गर्ने र अनुचित व्यवहार गर्ने गरेको रचेलको दाबी छ ।
उनका अनुसार, संस्थाले बाहिरी प्रोजेक्टहरू गर्न नदिएको, तर टिकटकमार्फत चिली पेस्ट र सौन्दर्य सामग्रीहरूको प्रचार गर्न दबाब दिएको थियो ।

इन्स्टाग्राममा रचेलले लेखेको पोस्ट :

यसबिच मिस ग्रान्ड इन्टरनेशनलका संस्थापक नवत इत्सारागृसिलले रचेलका आरोपहरू अस्वीकार गरेका छन् । इन्स्टाग्राममा पोस्ट गर्दै भनेको छ,“रचेल गुप्ताले आफ्ना तोकिएका कर्तव्यहरू पूरा नगरेको, संस्थाको अनुमति बिना बाहिरी प्रोजेक्टहरूमा संलग्न भएको, र ग्वाटेमालामा निर्धारित कार्यक्रममा सहभागी हुन अस्वीकार गरेको कारणले उनलाई पदमुक्त गरिएको हो ।”

संस्थाले ताज फिर्ता गर्न ३० दिनको समयसीमा दिएको छ र रचेल अब मिस ग्रान्ड इन्टरनेशनल २०२४ को उपाधि प्रयोग गर्न योग्य नरहेको स्पष्ट पारेको छ ।

रचेलको ताज खारेज भएसँगै फिलिपिन्सकी क्रिस्टिन जुलियान ओपियाजालाई मिस ग्रान्ड इन्टरनेशनल २०२४ को नयाँ विजेता घोषणा गरिएको छ ।

उनी यसअघि फर्स्ट रनर–अप थिइन् । यो घटनाले फिलिपिन्समा उत्साह ल्याए पनि भारतमा भने आलोचना र समर्थनको लहर फैलिएको छ । सामाजिक सञ्जालमा #SupportRachelGupta र #JusticeForRachel जस्ता ह्यास्ट्यागहरू ट्रेन्डिङमा छन् ।