लोपोन्मुख सुरेल जाति सम्बन्धी फोटो पुस्तक प्रकाशन

दोलखा। 

लोपोन्मुख सुरेल जातिको विगत र वर्तमान झल्कने फोटो पुस्तक ‘सुरेलका रङ्गहरु’ प्रकाशन गरिएको छ । दोलखाको गौरीशङ्कर गाउँपालिका वडा नम्बर– ५ सुरीमा मात्र रहेको लोपोन्मुख सुरेल जातिसम्बन्धी फोटो पुस्तक ‘सुरेलका रङ्गहरु’को प्रकाशन गौरीशङ्कर गाउँपालिकाले गरेको हो ।

नेपाल र नेपालीले गौरव गर्ने विषय भनेकै फरक पहिचान, भाषा, लिपि र संस्कार– संस्कृति सहितको विभिन्न जातजाति नै हो, गौरीशङ्कर गाँउपालिकाका अध्यक्ष विश्वास कार्कीले भने– हाम्रो पालिकामा लोपोन्मुख सुरेल जातिको वासस्थान छ भन्दा खुशी लाग्छ । 

आफ्नो पालिकामा रहेको लोपोन्मुख सुरेल जातिको विषयमा पछिल्ला पुस्ताहरुले पनि सहजै जानकारी लिन सकुन भन्ने उद्देश्यले उनीहरुको सम्पुर्ण विषय समेटिएको फोटो पुस्तक ‘सुरेलका रङ्गहरु’ प्रकाशन गरिएको अध्यक्ष कार्कीले बताए । 

गौरीशङ्कर गाउँपालिकाले लोपोन्मुख सुरेल जातिको फोटो पुस्तक ‘सुरेलका रङ्गहरु’ प्रकाशन गर्नु महत्वपूर्ण काम भएको गाउँपालिका उपाध्यक्ष उमा लुङ्गेली मगर बताउछन् ।

सुरेल जातिको जनसंख्या दुई सय ३१ रहेको छ । सुरेलहरुको ५० घर सुरीमा, ७ घर सुम्नामा र ३ घर खारेखोलामा रहेको सुरेल जाति उत्थान समाजका अध्यक्ष प्रह्लाद सुरेलको भनाई छ । 

‘सुरेलका रङ्गहरु’ फोटो पुस्तकमा उनीहरुको धर्म, संस्कृति, परम्परागत रीतिरिवाज, मठ– मन्दिर, भेषभुषा, परम्परागत पेशा आदि झल्कने फोटोहरु समावेश गरिएको पुस्तकको सम्पादक फोटो पत्रकार जीवन लामाले बताए । 

सुरेल जाति कसरी रहन गयो भन्ने तथ्यगत प्रमाण नभएपनि एउटा किंवदन्ती भने प्रचलनमा रहेको छ । किंवदन्ती अनुसार ससुरा ज्वाई बासे (ससुरा) र वीरबल (ज्वाई) भोटबाट शिकार खेल्दै सुरी आसपास आईपुगे । सोहि समय एकजना माझिको बच्चा एउटा शेर्पाले अपहरण गरेर लगेको थियो । बासे र वीरबलले शेर्पाबाट उक्त बच्चालाई मुक्त गरी माझिको जिम्मा लगाई दिए ।

 ससुरा ज्वाइँको उक्त कार्यबाट खुशी भएका माझीहरूले ती दुईलाई सूर्यबंशी भन्दै तेरमुफ (टिम्मुर वारी) दिएर बस्ने व्यवस्था गरे । उनीहरु माझीहरूसँगै बसेकै बेला कोठामा थुनेर राखेको एउटा माझिको छोरी गर्भवती भइन । उक्त गर्भ सूर्यबंशीहरु बाटै रहन गएको माझीहरूले आरोप लगाए । यसरी माझी र सूर्यवंशीको गर्भबाट भएको सन्तान सुरेल भए । 

सुरल जातिको उत्थान र संरक्षणको लागि गौरीशङ्कर गाउँपालिकाले फोटो पुस्तक ‘सुरेलका रङ्गहरु’ प्रकाशनसंगै सुरेल भाषाको स्थानीय पाठ्यक्रमको अध्यापनमा लगायतमा समेत सहयोग गर्दै आएको अध्यक्ष कार्कीले बताए ।