क्यानडाका प्रधानमन्त्री परिवार सहित घरबाट भागे: प्रधानमन्त्री निवासलाई २० हजार ट्रक चालकले घेरे, ७० किलोमिटर लामो  ट्रकहरूको लाइन

क्यानडाका प्रधानमन्त्री जस्टिन ट्रुडो र उनको परिवारले ठूलो विरोधको सामना गर्दै देशको राजधानीमा रहेको आफ्नो निवास छाडेर गोप्य स्थानमा सरेका छन्। राजधानी सहरमा हजारौं ट्रक चालक र अन्य प्रदर्शनकारीहरू जम्मा भए र शनिबार प्रधानमन्त्री ट्रुडोको निवासलाई घेराबन्दी गरेर कोरोना भ्याक्सिनको जनादेश र अन्य सार्वजनिक स्वास्थ्य प्रतिबन्धहरूको अन्त्यको लागि आह्वान गरे। यी ट्रक चालकहरूले आफ्नो ७० किलोमिटर लामो काफिलेको नाम ‘फ्रीडम कन्भोय’ राखेका छन् । ट्रक चालकहरूले क्यानाडाको झण्डासँगै ‘स्वतन्त्रता’को माग गर्दै झण्डा फहराउँदै छन्। उनीहरुले प्रधानमन्त्री ट्रुडोविरुद्ध नारा लगाएका छन् । यस आन्दोलनमा ट्रक चालकहरू पनि हजारौं अन्य आन्दोलनकारीहरूसँग सामेल छन् जसले कोरोना प्रतिबन्धको बिरूद्ध आफ्नो असन्तुष्टि व्यक्त गरिरहेका छन्। सडकमा हजारौं ठूला ट्रकको आवाज निरन्तर सुनिन थालेको छ भने चालकले निरन्तर हर्न बजाएर सरकारको विरोध गरिरहेका छन् । उनीहरु संसदमा पुगेका छन् ।

शनिबार, २०,००० भन्दा बढी ट्रक चालक र अन्य प्रदर्शनकारीहरू राष्ट्रिय राजधानी ओटावामा भेला भए। ट्रक चालकहरूले अमेरिकाको सीमा पार गर्न खोप अनिवार्य बनाएको विरोध गरेका छन्। केही दिनअघि क्यानडाका प्रधानमन्त्रीले ट्रक चालकलाई ‘कुनै महत्व नभएको अल्पसंख्यक’ भन्दै विवादास्पद अभिव्यक्ति दिएपछि ट्रक चालकहरूमा पनि आक्रोश छ । सहरको अवस्था गम्भीर बनेको छ । आलम के छ भने ओटावा जाने बाटोमा ७० किलोमिटरसम्म ट्रकको लाइन लागेकाले अन्य यात्रुलाई पनि आवतजावतमा समस्या भइरहेको छ ।