दुई दिनसम्म निगरानी गरेपछि आक्रमणकारीले पुण्य गौतमलाई हानेका थिए रड, को थिए उनी ?

काठमाडौं । रड प्रहारपछि घाइते भएका पुण्य गौतम खतरामुक्त भएका छन् । नेपाल मेडिकल कलेजमा उपचाररत उनको टाउकोमा दर्जन बढी टाँका लगाइएको छ ।

टाउकोमा दुई ठाउँ गहिरो चोट भए पनि अवस्था खतरामुक्त रहेको चिकित्सकहरूले जनाएका छन् ।

हातमा पनि सामान्य चोट लागेको उनलाई केही दिन अस्पताल राखेर डिस्चार्ज गर्ने तयारी रहेको अस्पतालले जनाएको छ ।

यस्तो थियो घटना

गौतम आफ्नो दैनिक कार्य सकेर सोमबार राति सवा ९ बजेतिर घर फर्किँदै थिए । मोबाइलमा कुराकानी गर्दै हिँडिरहेका उनलाई कसैले पछ्याइरहेको थाहा थिएन ।

घर नजिकै पुग्दा अचानक एक व्यक्तिले पछाडिबाट रडले टाउकोमा हान्यो । पछाडि फर्किए । केही बुझ्न नपाउँदै फेरि प्रहार भयो । अगाडि टाउकोमा चोट लाग्यो । फेरि केही प्रहार भए, उनले हातले छेके ।

छेक्ने क्रममा हातमा चोट लाग्यो । उनले गुहार माग्दै चिच्याएपछि आक्रमणकारी भाग्यो । गौतम रगताम्य भएर गौतम भुईँमा ढले ।

हल्लाखल्ला सुनेर स्थानीयहरू आइपुग्दा आक्रमणकारी भागिसकेका थियो । गौतमको मोबाइल भूँईमा खसेको थियो । ब्याट्री मोबाइलबाट उछिट्टिएको थियो ।

पुण्य गौतममाथि रड प्रहार, टाउको फुटेपछि आइसीयूमा (भिडिओ)

छिमेकीहरूका अनुसार दुई दिनदेखि शंकास्पद व्यक्तिहरू गौतमको घर वरिपरि घुमिरहेका थिए । साउद उनीहरूको कुनै योजना थियो ? घटनाबारे प्रहरीले अनुसन्धान सुरु गरेको छ ।

यो घटनाको पछाडि गौतमले सामाजिक सञ्जालमार्फत कसैको भण्डाफोर गरेका थिए ? वा कुनै व्यक्तिगत रिसइवीको परिणाम थियो ? उद्देश्य अझै खुल्न सकेको छैन ।

कसैले चिच्याएको सुनेपछि जाँदा गौतम रक्ताम्य अवस्थामा ढलिरहेका भेटिएको घटनास्थल नजिकका एकजनाले सुनाए ।

एक स्थानीयले भने, ‘टाउकोबाट रगत आइरहेको थियो । अगाडि टाउकोबाट बगेको रगत रोक्ने प्रयास गरिरहनुभएको थियो । पछाडिबाट रगतको धारा बगिरहेको थियो । उहाँलाई उठाएर ट्याक्सीमा तुरुन्त अस्पताल लग्यौँ ।’