गैंडासँग मोटरसाईकल ठोक्किँदा दुई घाईते

नवलपरासी ।

पूर्व पश्चिम महेन्द्र राजमार्गको कावासोतीस्थित खरकट्टा जंगलमा बुधबार दिउँसो गैंडासँग मोटरसाईकल ठोक्किँदा २ यात्रु घाईते भएका छन् ।

घाईते हुनेमा ना ३३ प ४२४२ नम्बर मोटरसाईकल चालक जिल्ला दोलखा बैतेश्वर गापा ४ घर भई काठमाडौं कागेश्वरी मनहरा ७ बस्ने ३५ वर्षीय कृष्ण दाहाल रहेका छन् । त्यसै गरि मोटरसाईकलमा सवार दोलखा जिल्ला बैतेश्वर घरभई मनहरा ७ बस्ने करिव ३२ वर्षका प्रदीप न्यौपाने घाईते भएको जिप्रका नवलपरासी पूर्वका सूचना अधिकारी प्रनाउ जेसी शाहले बताए ।

प्रनाउ शाहका अनुसार चालक दाहालको टाउको र हातमा गम्भीर चोट लागेको र न्यौपाने अवस्था सामान्य रहेकोले दुबै घाईतेलाई उपचारार्थ मध्यविन्दु जिल्ला अस्पताल डण्डा पठाइएको छ ।

पश्चिम बुटवलबाट नारायणगढतर्फ जाँदै गरेको मोटरसाईकल जंगलमा बाटो काट्दै गरेको एक सिँगे गैंडासँग अचानक ठोक्किँदा सो दुर्घटना भएको थियो ।