सुर्खेतमा फोर्स गाडी दुर्घटना अपडेट : चार जनाको मृत्यु, २५ घाइते

सुर्खेत । सुर्खेत–दैलेख सिमानास्थित वीरेन्द्रनगर नगरपालिका-१४ को रातानाङ्ग्ला नजिक भएको फोर्स गाडी दुर्घटनामा परी चार जनाको मृत्यु भएको छ ।

शुक्रबार दिउँसो दैलेख बजारबाट सुर्खेततर्फ आउँदै गरेको कर्णाली प्रदेश ०२००१ ख ०९९८ नम्बरको गाडी अनियन्त्रि भई दुर्घटनामा परेको गुराँस गाउँपालिकाका-८ का वडाध्यक्ष दिपेन्द्र वलीले जानकारी दिए ।

उनका अनुसार दुर्घटनामा परी २५ जना घाइते भएका छन् । वडाध्यक्ष वलीका अनुसार घाइते २५ जनाको उद्दार गरी थप उपचारका लागि कर्णाली प्रदेश अस्पताल सुर्खेत पठाइएको छ ।

२९ जना सवार उक्त गाडी सडकभन्दा झण्डै दुई सय मिटर तल खसेको छ । मृतकको पहिचान खुल्न बाँकी रहेको छ ।