सवारी दुर्घटनामा चार जनाको मृत्यु

काठमाडौं।

नवलपरासी पश्चिम, सुस्ता गाउँपालिका-१ बरूवा चोकस्थित सडकमा बर्दघाटबाट त्रिवेणीतर्फ जाँदै गरेको लु.२ ख ८९३ नम्बरको ट्रकको ठक्करबाट साईकलयात्री सोही गाउँपालिका-१ बरूवा बस्ने ६५ वर्षीय रामजी नेपालीको मंगलबार बिहान मृत्यु भएको छ । ठक्करबाट गम्भीर घाइते भएका उनको शहिद स्मृति सामुदायिक अस्पताल चौपत्तामा थप उपचारको क्रममा मृत्यु भएको हो । ट्रक चालकलाई प्रहरीले नियन्त्रणमा लिएको छ ।

डडेल्धुरा, आलिताल गाउँपालिका-२ डोबरास्थित सडकमा डोबराबाट धातडीतर्फ जाँदै गरेको सु.प.प्र. ०१-००२ त ६३८२ नम्बरको ट्याक्टर मंगलबार बिहान दुर्घटना हुँदा चालक सोही ठाउँ बस्ने ३२ वर्षीय दल बहादुर बिष्टको मृत्यु भएको छ । दुर्घटनामा गम्भीर घाइते भएका उनको उपचारको लागि अस्पतालतर्फ लैजाने क्रममा बाटोमै मृत्यु भएको हो ।

मोरङ, कानेपोखरी गाउँपालिका-२ रंगेली कानेपोखरीस्थित सडकमा बा.प्र ०२-००१ क ०२७४ नम्बरको टिपरको ठक्करबाट पैदलयात्री सोही ठाउँ बस्ने ३० वर्षीय रमेश दाहालको मृत्यु भएको छ । टिपरले सोमबार बिहान ठक्कर दिँदा गम्भीर घाइते भएका उनको बिएण्डसि अस्पताल बिर्तामोड झापामा उपचारको क्रममा मंगलबार बिहान मृत्यु भएको हो । टिपर चालकलाई प्रहरीले नियन्त्रणमा लिएको छ ।

सुनसरी, रामधुनी नगरपालिका-२ शिवचोकस्थित सडकमा प्र.१-०२-००४ ह ४३१५ नम्बरको सिटी सफारीलाई युपि १६ इके १९८९ नम्बरको स्कार्पियोले मंगलबार दिउँसो ठक्कर दिँदा सिटी सफारी चालक सोही नगरपालिका-५ बस्ने ३६ वर्षीया सोनिया कुमारी चौधरीको मृत्यु भएको छ । दुर्घटनामा गम्भीर घाइते भएकी उनको स्थानीय ओमसाई अस्पताल झुम्कामा उपचारको क्रममा मृत्यु भएको हो । स्कार्पियो चालकलाई प्रहरीले नियन्त्रणमा लिएको छ ।
दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।