१० हजारमा युवती मिलाइदिने, बलात्कार मुद्दाको धम्की दिँदै ६० लाख माग्ने जेल चलान

काठमाडौं । प्रहरीसमेतको मिलेमतोमा व्यापारीलाई हनी ट्रयापिङमा फसाइएको अभियोगमा पक्राउ परेका एकजना जेल चलान भएका छन् ।

जिल्ला अदालत, ललितपुरका न्यायाधीश टेकराज जोशीको एकल इजलासले घटनाका योजनाकार ताज इस्लामलाई बिहीबार पुर्पक्षका लागि थुनामा पठाउने आदेश दिएको हो ।

प्रहरीको केन्द्रीय अनुसन्धान ब्यूरोले सङ्गठित अपराध र आपराधिक लाभ मुद्दा दायर गरे पनि अन्य तीन जनालाई रिहा गर्न अदालतले आदेश दिएको छ ।

पैसा असुल्न प्रयोग भएकी सुष्मा विक दुई लाख धरौटीमा छुटेकी छिन् । उनकी साथी भीमादेवी थापासँग एक लाख धरौटी माग गरिएको छ । सहायक हवलदार महेन्द्र हमाललाई भने साधारण तारेखमा छाड्ने आदेश भएको छ ।

गत ७ असोजमा मोरङका एक व्यापारीलाई ललितपुरको भैँसेपाटी प्रभागमा थुनामा राखी बलात्कार मुद्दामा फसाउने भन्दै ३० लाख असुलिएको थियो ।

प्रभागकी तत्कालीन प्रमुख रहेकी इन्स्पेक्टर बिनु शाहीको निर्देशनमा सो घटना भएको थियो । निलम्बनमा रहेकी इन्स्पेक्टर शाही भने फरार छिन् । गिरोहका सदस्य दर्शन पोखरेललाई पनि फरार प्रतिवादीका रूपमा मुद्दा चलाइएको छ ।

यस्तो थियो घटना

साउनको ४ गते मोरङको गोकर्ण रिसोर्टमा व्यापारी इन्द्र आफ्ना केही साथीहरूसँग रमाइरहेका थिए । पिउने र हाँसखेल गर्ने क्रम चल्दै थियो । रक्सीको नशाले उनीहरूको उमङ्ग झन् बढाउँदै लगेको थियो ।

‘होटल सेभेन स्टार’ हेर्ने व्यक्ति रिसोर्टमा आए । ‘एउटी युवती मिलाइदिन्छु । एक रातको १० हजार लाग्छ’ ती व्यक्तिले इन्द्रलाई भने ।

नशामा थिए इन्द्र, त्यही सुरमा सहमत भए । उनलाई लाग्यो, यो अवसर रमाइलोको लागि हो । ‘सेभेन स्टार होटल’का ती व्यक्तिले सुष्मा विक नामकी युवतीलाई बोलाए ।

युवती इन्द्रलाई भेट्न आइन् । इन्द्रले ती युवतीलाई इलामको कन्याम लगे । त्यहाँको एक होटेलमा दुवैले सहमतिमा यौन सम्पर्क राखे ।

भोलिपल्ट छुट्ने बेलामा इन्द्रले युवतीलाई पहिला भनिएको रकमभन्दा धेरै दिए – ३० हजार रुपैयाँ । मागेको भन्दा २० हजार बढी पैसा पाएपछि सुष्माको मनमा एउटा प्रश्न उठ्यो – ‘यो व्यापारीसँग धेरै पैसा रहेछ, नत्र १० हजार माग्दा किन दियो एकै रातको ३० हजार ।’

साउन १९ गते इन्द्रलाई उनै सुष्माको फोन आयो । ‘मलाई अरू पैसा देऊ, होइन भने बलात्कारको मुद्दा हाल्छु’ उनको स्वर धम्क्याउने खालको थियो ।

इन्द्रको दिमागमा तुरुन्त खतरा बज्न थाल्यो । केही समयमै ताज इस्लाम र दर्शन पोखरेल नाम गरेका मानिसहरूले इन्द्रलाई फोन गर्न थाले ।

भन्न थाले, ‘तपाईंलाई थाहा छ नि यो मामिला कस्तो हुन सक्छ ? सुष्माको केश चाँडै पैसा मिलाऊ, होइन भने तिम्रो जीवन बर्बाद हुनेछ ।’

इन्द्र डराए । उनीमाथि निगरानी भइरहेको थियो । ताज इस्लामको समूहका सदस्यहरूले उनलाई हरपल त्रासमा राख्न थाले ।

असोज ७ गते, इन्द्रलाई ललितपुरको बुङ्बुङ्ती प्रहरी प्रभाग बोलाइयो । त्यहाँ इन्स्पेक्टर शाहीको भूमिका देखियो ।

उनले भनिन्, ‘तिमीलाई थाहा छ, यो मुद्दा कति गम्भीर छ । ६० लाखमा सहमति गर, नत्र १० वर्ष जेल जानेछौँ । इज्जत पनि रहनेछैन ।’

इन्द्रले कुनै उपाय नदेखी २० लाख रकम उनै गिरोहको एक साथी भिमादेवी थापाको खातामा ट्रान्सफर गरे । थप १० लाखको चेक बुझाए । तर, इन्द्रको मनमा शंका जाग्यो । यो केवल मुद्दा मिलाउने बहानामा जबरजस्ती असुली थियो ।

इन्द्रले सीआईबीमा उजुरी गरे । अनुसन्धानले घटनाको पर्दा फोड्यो । योजनाकार ताज इस्लामलाई पक्राउ गरियो । शाही, जो घटनाको मुख्य सूत्रधारमध्येकी थिइन्, फरार भइन् । दर्शन पोखरेललाई समेत फरार सूचीमा राखियो ।

पैसा असुल्न प्रयोग भएकी सुष्मा विक दुई लाख धरौटीमा छुटेकी छिन् । उनकी साथी भीमादेवी थापासँग एक लाख धरौटी माग भएको छ, जसको खातामा पैसा हालिएको थियो ।