सप्तरीको डाक्नेश्वरीका दुई वटै वडामा जसपाको जित  

सप्तरी ।

सप्तरीको डाक्नेश्वरी नगरपालिका वडा नं ४ को अध्यक्षमा जनता समाजवादी पार्टी नेपालका देवेन्द्रप्रसाद यादव विजयी भएका छन् ।

आइतबार सम्पन्न उपनिर्वाचनमा यादवले तीन सय ७२ मत प्राप्त गरेको निर्वाचन आयोगले जनाएको छ। यादवका निकटतम प्रतिद्वन्द्वी नेपाली कांग्रेसका जोगिन्द्र राय अमातले दुई सय ७७ मत प्राप्त गरे।

साथै जनमत पार्टीका उदय नारायण पण्डितले दुई सय ३१, नेपाल कम्युनिष्ट पार्टी (एमाले)का सञ्जयकुमार यादवले ६८, नेपाल कम्युनिष्ट पार्टी (माओवादी केन्द्र)का भागवत रामले नौ, राष्ट्रिय प्रजातन्त्र पार्टीका रामकुमार यादवले छ र नागरिक उन्मुक्ति पार्टीका शिवकुमार रामले तीन र जनता समाजवादी पार्टीका रविन्द्र रायले तीन मत प्राप्त गरेको निर्वाचन आयोगले जनाएको छ। डाक्नेश्वरी नगरपालिका वडा नं. १ मा जसपाका धिरेन्द्रकुमार साह निर्वाचित भएका छन् ।

साहले ६५२ मतसहित निर्वाचित हुँदा नेपाली कांग्रेसका भूलियादेवी थरुनी ५८७ मतसहित निकटतम् प्रतिद्वन्द्वी रहिन् । एमालेकी भगवानी साहले २६५ मत प्राप्त गरिन्।