जीप दुर्घटना हुँदा एक जनाको मृत्यु, पाँच घाइते

उदयपुर । 

सोमबार गाईघाट बजारबाट जिल्लाकै पहाडी क्षेत्रको लिम्चुङबुङ तर्फ मालसामान र यात्री लिएर जाँदै गरेको जीप दुर्घटना हुँदा १ जनाको ज्यान गएको छ भने ५ जना घाइते भएका छन्। 

लिम्चुबुङ गाउँपालिका वडा नं ३ स्थित तिनचोकेमा गाईघाटबाट गएको बा १ च ३२६७ नंको लैण्डरोबर गाडी ओरालो बाटोमा ब्रेक फेलभै सडकबाट करिब ३ सय मिटर तल खोलामा खसेको थियो । 

खोलाामा खसेको सो गाडीमा मालसामान र ५ जना यात्री रहेकोमा सवारी चालक त्रियुगा नगरपालिका  १६ सुकौराका वर्ष २६ को युवराज तामांगको घटनास्थलमै ज्यान गएको र अन्य ५ जना घाइते भएको जिल्ला प्रहरी कार्यालय उदयपुरका प्रहरी निरीक्षक सन्तोष कार्कीले बताए ।

दुर्घटना भएपछि घटनास्थलमा प्रहरी टोली पुगेर घाइते भएकाहरुलाई जिल्ला अस्पतालमा उपचारकालागि पठाइएको प्रहरी निरीक्षक कार्कीले बताए । सो दुर्घटनामा परी घाइते हुनेहरुमा उदयपुर लिम्चुङबुङ गा पा ३ बस्ने वर्ष १९ की सुस्मिता खत्री, सोही ठाउँ बस्ने निजको छोरा वर्ष ५ को सुबिम खत्री, ऐ ४ खाप्राङ बस्ने वर्ष ४७ को बल दिप राई, ऐ ऐ बस्ने वर्ष ४१की निल लक्ष्मी राई र ऐ ऐ बस्ने वर्ष  ६२ की चरी माया राई रहेको प्रहरी निरीक्षक कार्कीले बताए ।