झापामा २९ हजार ७०० अमेरिकी डलरसहित एक जना पक्राउ

बनियानी, २८ मंसिर । झापाको कमल गाउँपालिका–३ बाट अमेरिकी डलरसहित एक जनालाई प्रहरीले हिजो दिउँसो पक्राउ गरेको छ ।

पूर्वपश्चिम लोकमार्ग अन्तरगत कमल–३ स्थित केर्खाबाट गौरादह नगरपालिका–५ का २५ वर्षीय मोहम्मद नौसाद मियालाई अमेरिकी डलरसहित पक्राउ गरिएको जिल्ला प्रहरी कार्यालय झापाका प्रवक्ता प्रहरी नायब उपरीक्षक कृष्णकुमार चन्दले जानकारी दिनुभयो ।

त्यहाँस्थित पूर्व–पश्चिम लोकमार्गमा सवारी साधन चेकजाँच गर्ने क्रममा दमकबाट बिर्तामोडतर्फ जाँदै गरेको प्रदेश १–०२–००१ ख ९५३० नम्बरको यात्रुबाहक बसमा सवार मियाले बोकेको कालो झोला चेकजाँच गर्दा स्रोत नखुलेको अमेरिकी डलर एक सय दरका २९७ थान फेला परेको उहाँले बताउनुभयो ।

आजको नेपाली दररेट अनुरसार उक्त डलरको नेपाली रू ४० लाख ३३ हजार आठ सय ५४ बराबरको रहेको छ । घटनाका सम्बन्धमा इलाका प्रहरी कार्यालय दमकबाट थप अनुसन्धान भइरहेको जिल्ला प्रहरी कार्यालय झापाले जनाएको छ ।

The post झापामा २९ हजार ७०० अमेरिकी डलरसहित एक जना पक्राउ appeared first on Jhapa Online.