गृहमन्त्रीको दाबी: जीबी राईलाई पक्राउ गर्ने काम अघि बढिरहेको छ, रविमाथि अमानवीय व्यवहार भएको छैन

चितवन । सहकारीको रकम अपचलनको आरोपमा पक्राउ परेका रवि लामिछानेमाथिको अनुसन्धान प्रभावित हुने गरी जथाभाबी नबोल्न गृहमन्त्री रमेश लेखकले जिम्मेवार दलका नेतालाई आग्रह गरेका छन् ।

नेपाल प्रेस युनियन चितवनले आइतबार भरतपुरमा आयोजना गरेको पत्रकार सम्मेलनमा बोल्दै गृहमन्त्री लेखकले कानुनी हिसाबले अनुसन्धान भइरहेको घटनामा नबोल्न चेतावनी दिएका हुन् ।

केही दिन अगाडि चितवनमा भएको कार्यक्रममा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले लामिछानेमाथि प्रतिशोध राखेको भनी गरेको टिप्पणी गलत भएको बताएका थिए ।

‘प्रचण्ड’लक्षित भनाइ राख्दै गृहमन्त्री लेखकले यस्ता अभिव्यक्तिले अनुसन्धानलाई प्रभावित बनाउन खोजिएको दाबी गरे ।

कांग्रेस नेता डा.शेखर कोइरालाले पनि भरतपुरमा पत्रकार सम्मेलनमा बोल्दै लामिछानेलाई रातारात चितवनबाट पोखरा लगिएकोमा आपत्ति जनाउँदै अमानवीय व्यवहार भएको बताएका थिए ।

लामिछानेमाथि कुनै अमानवीय व्यवहार नभएको स्पष्ट पार्दै अदालतलाई प्रभावित बनाउन गलत हल्ला फिजाएको भन्दै न्यायिक प्रक्रिया प्रभावित हुने गरी नबोल्न लेखकले आग्रह दिए ।

‘न्यायिक प्रक्रियालाई प्रभावित हुने गरेर नबोलौँ । चाहे सरकारमा रहेका नेताबाट होस् चाहे प्रतिपक्षी दलका नेताबाट होस् । कसैबाट पनि अदालतको न्यायिक प्रक्रिया प्रभावित हुने गरी बोल्नुहुन्न’ उनले भने ,‘प्रचण्डजीले जुन टिप्पणी गर्नुभयो त्यो दुर्भाग्यपूर्ण हो । त्यसरी टिप्पणी गर्नुहुन्न । कहाँनिर प्रतिशोध भएको छ त्यो देखाउनु पर्‍यो नि । कानुन पनि मान्दिन अदालत पनि मान्दिन मैले भनेको हुनपर्छ भन्ने हो भने यो संविधान कहाँ कानुनले भनेको भन्दा बढी अवधि थुनामा राखेको छ ? ’

मन्त्री लेखकले सहकारी ठगीको आरोप लागेका जीबी राईलाई पक्राउ गर्ने काम अघि बढिरहेको बताए । सहकारीका बचतकर्ताको रकम फिर्ता गराउन सरकार लागिपरेको उनको भनाइ छ।