इटालियन महिला पत्रकार साला इरानमा पक्राउ

काठमाडौं । इटालियन पत्रकार सिसिलिया साला इरानमा पक्राउ परेकी छन् ।

इटालीका विदेशमन्त्रीले सालालाई आठ दिनअघि इरानको राजधानी तेहरानबाट पक्राउ गरी हिरासतमा लिइएको जानकारी दिए ।

इटालियन पत्रिका इल फोग्लियोकाअनुसार सालालाई इभिन जेलमा राखिएको छ । उनीमाथि लागेको आरोपको कतै पनि उल्लेख छैन ।

यसै महिनाको सुरुमा पत्रकार भिसा पाएर इरान पुगेकी सालाले ‘कन्भरसेशन अबाउट पितृसत्ता’ शीर्षकको पोडकास्ट एपिसोड अपलोड गरेकी थिइन् ।

रिपोर्टका अनुसार इटालियन कूटनीतिज्ञहरूले उनलाई जेलमा भेटेका छन् र उनको रिहाइ सुनिश्चित गर्न प्रयास गरिरहेका छन् ।