सुदूरपश्चिमले कर्णालीलाई १० विकेटले हरायो

काठमाडौं । महिला प्रधानमन्त्री कप क्रिकेटमा सुदूरपश्चिम प्रदेशले कर्णालीलाई १० विकेटले पराजित गरेको छ ।

धनगढीस्थित फाप्ला क्रिकेट मैदानमा शुक्रबार भएको खेलमा २१ रनको लक्ष्य सुदूरपश्चिमले १.३ ओभरमा कुनै विकेट नगुमाइ पूरा गरेको हो ।

जारी प्रतियोगितामा सुदूरपश्चिमको यो लगातार तेस्रो जित हो ।

सुदूरपश्चिमका लागि कविता कुँवर १४ र मनिषा बोहरा ५ रनमा अविजित रहिन् ।

यसअघि, कर्णालीले निर्धारित ५ ओभरमा ७ विकेटको क्षतिमा २० रन बनाएको थियो ।

कर्णालीका लागि श्रुती बुढा ८ रनमा अविजित रहँदा रमा बुढाथोकीले ६ रन बनाइन् ।

आशिका महराले ३, कविता कुँवरले २ तथा रितु कनौजियाले १ विकेट लिइन् ।

खराब मौसमका कारण मैदान भिज्दा खेल निर्धारित समयभन्दा ढिला सुरु भएको थियो । ओभर घटाएर ५ ओभर निर्धारित गरिएको थियो ।

अर्को खेलमा गण्डकी र लुम्बिनी प्रदेशबीच प्रतिस्पर्धा हुनेछ ।