नेपाली चियाको स्वाद फैलाउन कस्सिएको फिक्कलको जोडी

काठमाडौं । काम गर्ने मानिसले जहाँ पनि सम्भावना देख्छन् र स्थापित हुन सक्छन् भन्ने बलियो उदाहरण हुन्, रौनियार दम्पती ।

रौनियार दम्पती त्यी जोडी हो, जसले देशमै बसेर सम्भावनाको गोरेटो खनिरहेको छ – ‘अरोमा टी’ मार्फत । इलामको फिक्कल निवासी यो जोडीले हाल आफूमात्र स्वरोजगार नभएर अरुलाई रोजगारीसमेत दिएको छ ।

‘अरोमा टी’ र रौनियार दम्पती

‘अरोमा भनेको चाहिँ फ्लेवर भयो, क्वालिटी भयो, सुगन्ध भयो । फेरि चिया भनेको पनि एक किसिमको फ्लेवर नै हो । त्यसैले यही ‘ब्रान्ड नेम’ बनाउन वेस्ट हुने भएकाले अरोमा टी राखेका हौँ ।’

चिया व्यवसायी राजेश राैनियार बताउँछन् । राजेशका अनुसार सन् २०१५ मा ग्लोबल कलेज पढिरहेकी निकिता नेपालबाट जन्मिएको थियो, ‘अरोमा टी’ ।

जागिरभन्दा व्यापार व्यवसायमा झुकाव रहेकी निकिताले एमबीए तहको पढाई सकेपश्चात औद्योगिक क्षेत्रमा पाइला चालेकी थिइन् । त्यसै दाैरान निकिता र राजेश विवाहबन्धनमा बाँधिए ।

विवाहपश्चात निकिताको सपनालाई राजेशले टेको हाले । त्यसपश्चात् निकिताकाे व्यवसायलाई थप विस्तार गर्न आफूहरु नयाँनयाँ आइडियामा काम गर्न थालेको राजेश सुनाउँछन् ।

आफूलाई सानैबाट जागिर गर्नभन्दा पनि व्यापार गर्न मनपर्ने निकिताको भनाइ छ । अराेमा टीभन्दा अगाडी ग्यास सिलिन्डर बिक्रेतादेखि कुर्ता सुरुवाल हुँदै पेपर बिक्रेतासम्मको अनुभव बटुलेकाे उनी बताउँछिन् ।

व्यवसाय सुरु गर्दाका सङ्घर्ष सुनाउँदै उनी भन्छिन् ‘मैले एकदमै ग्रास लेभलबाट काम गर्दै आएकी हुँ । ग्यास सिलिन्डर बेचेर, कुर्ता सुरुवाल बेचेर, पेपर बेचेर लगायतका विभिन्न काम गर्दै पैसा जम्मा गरेर मैले होस्टेल खाेलेकी थिए ।’ उनले थपिन्, ‘होस्टलको नाम अरोमा थियो । त्यहि नामबाट कन्भर्ट गरेर अरोमा प्याकेजिङ इन्ड्रष्टिज र नेपाल अरोमा ट्रेडर्सको नामबाट अरोमा चियाको सुरुवात गरेका हाैँ ।’

उनी इलाममा धेरै चिया उत्पादन हुने भएकाले पनि चिया व्यवसाय गर्न आफू प्रेरित भएको सुनाउँछिन् ।

राजेश आफैँले पनि काठमाडौं विश्वविद्यालयबाट एमफिल गरेका छन् । हाल उनी एमबिएका विद्यार्थीलाई अध्यापन गराउने फ्याकेल्टीका प्राध्यापक पनि हुन् ।

‘(ब्यानरमा लेखिएको अरोमा टी) यो देखाउँदै मेरो श्रीमतीको कन्सेप्ट हो । उहाँले देख्नुभएको सपनालाई मैले साथ दिएको हुँ । आज हाम्रो सपना सफलता बनेको छ ।’ राजेश बताउँछन् ।

निकिताको कन्सेप्टलाई ब्रान्डमा स्थापित गर्न आफूले भूमिका निभाएको सम्झन्छन् राजेश । हाल इलामको फिक्कलस्थित सूर्योदयमा छ उनीहरूको चिया उद्योग । त्यहीबाट अरोमा टी ब्याग उत्पादन र प्याकिङ हुने उनीहरू बताउँछन् ।

सात सय रोपनी चिया बगान

राजेश भन्छन्, ‘हाम्रो चाहिँ फिक्कलमा ६, ७ सय रोपनी जग्गा छ । जसमा अरोमा इन्ड्रष्टीजको लागि चिया खेती हुन्छ । त्यसबाहेक, अलैँची, किवी र ब्रुम खेती पनि गर्छौँ ।’ उद्योगको लागि चाहिने सम्पूर्ण कच्चा पदार्थ फिक्कलबाटै जुटाउने उनी बताउँछन् ।

उनीहरूको कारखानाबाट विभिन्न प्रकारका ग्रीन टी, अथ्रोडक्स ब्ल्याक टी, गोल्डेन टी, सिल्भर टी, सीटीसी लगायतका उत्पादन हुन्छन् । जसलाई ब्यागमा प्याक गरेर बजारमा पठाइन्छ ।

अर्थोडक्स चिया फिक्कलको आफ्नै उत्पादन भए पनि सीटीसी भने झापाको बिर्तामोडबाट ल्याउने गरेको राजेशको भनाइ छ ।  उनी भन्छन्, ‘सीटीसी चिया किनेर मसलामा मिसाएर टी ब्याग बनाइ बेच्छौँ । उचाइको कारणले सीटीसी फिक्कलमा उत्पादन हुँदैन त्यसैले किन्न पर्छ ।’ मान्छेलाई चिया भन्नेबित्तिकै इलामको याद आउने भए पनि सीटीसी यहाँ उत्पादन गर्न नसकिने उनी जनाउँछन् ।

व्यावसायिक अनुभव

आफूसँग व्यापारिक योजना भएर मात्र नपुग्ने राजेशको धारणा छ । उनी भन्छन्, ‘उत्पादनभन्दा चुनौतीको विषय बजारीकरण हो । यो मेहनत नगरी हुँदैन । मार्केट आफैँ बनाउनु पर्छ ।जसको लागि आफ्नो प्रोडक्टको विशेषता र महत्त्व ग्राहकलाई बुझाउन सक्नुपर्दछ ।’

प्रतिस्पर्धात्मक बजारमा केही प्रिमियम निकाले मात्र सफल भइने उनी बताउँछन् । ग्रीन टी र ब्ल्याक टीको मिसावटरहित २२ वटा फ्लेवरमा टी ब्याग बनाएको पहिलो कम्पनी सायद आफूहरूकै रहेको उनको दाबी छ । विश्व परिवेशलाई नियाल्ने हो भने नेपाली चिया भनेर स्थापित भएको कुनै चिया नरहेको पनि उनको जिकिर छ ।

दार्जिलिङ चियालाई ब्रान्ड बनाएर इन्डियाले बेचिरहेको उदाहरण दिँदै उनले भने ‘न्युओर्क टाइम्समा आएको अध्ययन प्रतिवेदनअनुसार दार्जिलिङको भन्दा नेपालको इलामको चिया राम्रो छ ।’

चीन, भारतजस्ता छिमेकी मुलुकबाट पनि नेपालको अर्थोडक्स चियाको माग भएको उनी बताउँछन् । अन्तर्राष्ट्रियस्तरमा अरोमा टीको बजार विस्तार गर्न आफूहरू लागिपरिरहेकाे राजेशको भनाइ छ ।

निकिता आफैँ पनि चिया सम्बन्धी विभिन्न तालिम लिन देश विदेश घुम्ने गरेकी छिन् ।