नेपालस्थित भारतीय दूतावासमा ७६ औँ गणतन्त्र दिवस मनाइयो

काठमाडौं । नेपालस्थित भारतीय दूतावासमा ७६ औँ भारतीय गणतन्त्र दिवस विविध कार्यक्रमका साथ मनाइएको छ। नेपालका लागि भारतीय राजदूतले राष्ट्रिय झण्डा फहराएर कार्यक्रमको शुभारम्भ गरेका थिए।

कार्यक्रममा भारतका राष्ट्रपति द्रौपदी मुर्मुको सम्बोधन प्रसारण गरिएको थियो। भारतीय सेनाका शहीद परिवारलाई राहत रकम वितरण गर्दै शहीदप्रति श्रद्धाञ्जलि अर्पण गरिएको थियो। साथै, नेपालका विभिन्न विद्यालयहरूलाई पुस्तकहरू प्रदान गरी शिक्षा क्षेत्रमा सहयोग पुर्‍याउने प्रयास गरिएको थियो।

कार्यक्रममा भारतीय संस्कृति झल्कने विभिन्न सांस्कृतिक कार्यक्रमहरू प्रस्तुत गरिएका थिए। यस्तै कार्यक्रममा भारत र नेपालबीचको मित्रता र सहयोगलाई प्रगाढ बनाउने विषयमा जोड दिइएको थियो।

कार्यक्रमले भारत र नेपालबीचको ऐतिहासिक सम्बन्धलाई थप प्रगाढ बनाउने विश्वास गरिएको छ। दुई देशबीचको सांस्कृतिक, आर्थिक र सामाजिक सम्बन्ध सदैव घनिष्ठ रहिआएको छ।