विकास निर्माणमा ‘ब्रेक–थु’ मात्र होइन ‘ब्रेक’ लगाएर राखिएका कामलाई ‘थ्रु’ गरेका छौं : प्रम ओली

काठमाडौं । प्रधानमन्त्री केपी शर्मा ओलीले आफ्नो नेतृत्वमा बनेको सरकारले रोकिएका थुप्रै कामको ब्रेक थ्रु गरेको बताएका छन् ।

शुक्रबारबाट शुरू भएको संसदको हिउँदे अधिवेशनलाई सम्बोधन गर्दै प्रधानमन्त्री ओलीले निर्माण प्रक्रियाका क्रममा रहेका कामलाई सकाउन प्राथमिकतापूर्वक काम गरेको बताएका हुन् ।

‘विकास निर्माणका काममा ‘ब्रेक–थु’ मात्र होइन ‘ब्रेक’ लगाएर राखिएका कतिपय कामलाई पनि हामी आएपछि ‘थ्रु’ गरेका छौं,’ उनले भने ।

सरकारको प्राथमिकता थालेको काम सकाउने हो भएको भन्दै यसपटक क्याबिनेटको पहिलो बैठकले कीर्तिपुरको क्रिकेट खेलमैदानलाई रंगशाला बनाउने र त्यसमा फ्लड लाइट जोड्ने निर्णय गरेको बताए ।

त्यसका लागि टेण्डर आह्वान भएको र तोकिएको दिनभित्रै त्यसलाई सम्पन्न गर्नेगरी काम अघि बढिरहेको ओलीक भनाइ छ ।

‘रंगशालाकै कुरा गर्दा सुर्खेतमा आधुनिक कर्णाली रंगशाला तयार भएको छ । देशको दुर्गम भूगोल मानिने कर्णालीमा आधुनिक रंगशाला– यो हाम्रा युवाको भविष्यका लागि सुखद सन्देश हो,’ ‘ओलीले भने ।