५५ वर्षीया ‘बुलेट आमा’ को काठमाडौं महानगरद्वारा प्रशंशा

काठमाडौं । काठमाडौं महानगरपालिकाले ‘बुलेट आमा’ भनेर चिनिने शुशिला उप्रेती तिवारीको बुलेट मोटरसाइकल यात्राको प्रशंशा गरेको छ । महानगरपालिकाले बिहीवार एक कार्यक्रम गरी तिवारीलाई प्रशंशा पत्र प्रदान गरेको हो ।

काठमाडौं महानगरकी उपप्रमुख सुनिता डंगोलले उनलाई प्रशंशा पत्र प्रदान गर्दै आगामी अन्तरदेशीय यात्रा सफलताको शुभकामना दिइन् । प्रशंसा प्रदान गर्दै उपप्रमुख डंगोलले, तिवारीको मोटरसाइकल यात्रा सहासी नेपाली महिलालाई प्रतिनिधित्व गर्ने सन्देश भएको उल्लेख गरिन् । ‘नेपाली महिलाहरुले लगाउने गुन्युचोली लगाएर ५५ वर्षको उमेरमा मोटरसाइकलबाट यात्रा गर्नु अरु महिलाहरुका लागि केही नयाँ गर्न सकिन्छ भन्ने उत्प्रेरणा हो,’ उनले भनिन् । डंगोलले धारणा राख्दै अन्तरदेशीय मोटरसाइकल यात्रा सफलताको कामना गरिन् ।

झापाको बुधबारे बसोबास गर्ने ५५ वर्षीया तिवारीले नेपाली महिलाको राष्ट्रिय पोशाक ‘गुन्युचोली’ लगाएर विश्वशान्तिको कामना गर्दै भदौ ५ गते मेचीबाट मोटरसाइकल यात्रा थालनी गरेकी थिइन् ।

उनी नवौँ दिनको मध्यान्हमा सुदुरपश्चिम प्रदेश कञ्चनपुर जिल्लाको गड्डाचौकीमा पुगेर यात्रा समापन गरेकी थिइन् । विगत यात्रा र आगामी योजनाका विषयमा जानकारी दिँदै उनले भनिन्, ‘सहासी र शसक्त नेपाली महिलाको पहिचान प्रवर्धन गर्न अब भारत, बंगालादेश, मलेसिया हुँदै थाइल्याण्डसम्म यात्रा गर्नेछु ।’