कनकाईमा श्रीमतीको हत्या, घाइते श्रीमानको अस्पतालमा उपचार हुँदै

कनकाई, १२ चैत । झापाको कनकाई नगरपालिका–५ मा एक जना महिलाको हत्या भएको छ । आज बिहान अन्दाजी ४० वर्षीया मनिषा मग्रान्तीको हत्या भएको हो ।

घरायसी विवादका क्रममा श्रीमान लालबहादुर सार्कीले मनिषाको घाँटीमा धारिलो हतियार प्रहार गरी हत्या गरेको जिल्ला प्रहरी कार्यालय झापाकी इन्सपेक्टर मेहङ्गी तामाङले बताउनुभयो ।

श्रीमतीको हत्यापछि लालबहादुरले आफ्नो घाँटी पनि रेटेका छन् । घाइते सार्कीको बिर्तामोडस्थित बिएण्डसी अस्पतालमा उपचार भइरहेको कनकाई ५ का वडाध्यक्ष तथा नगर प्रवक्ता कृष्णबहादुर राईले बताउनुभयो ।

लालबहादुर दुई वर्षदेखि स्थानीय योगेन्द्र बस्यालको घरमा डेरा गरी बस्दै आएका थिए । योगेन्द्र बस्यालका परिवार विदेशमा रहेकोे बुजिएको छ। स्थानीयका अनुसार मनिषा उनकी कान्छी श्रीमती हुन् । जेठी श्रीमतीसहित चार छोराछोरी ताप्लेजुङको सिरिजङ्गा गाउँपालिका १ सिनाममा बस्दै आएको वडा अध्यक्ष राईले बताउनुभयो ।

वडाध्यक्ष राईका अनुसार आज बिहान सबेरै लालबहादुरले श्रीमती मरेको भन्दै गाउँलेलाई खबर गरेका थिए । गाउँले आइनपुग्दै उनले आफ्नै घाँटीमा धारिलो हतियारले हानेको वडाध्यक्ष राईले बताउनुभयो । घटनास्थलमा पुगेको प्रहरीले अहिले आवश्यक कानुनी प्रक्रिया अघि बढाएको जनाएको छ।

The post कनकाईमा श्रीमतीको हत्या, घाइते श्रीमानको अस्पतालमा उपचार हुँदै appeared first on Jhapa Online.