दुर्गा प्रसाईंलाई पक्राउ गर्न खटियो प्रहरी

काठमाडौं । राजावादी प्रदर्शनका  कमाण्डर दुर्गा प्रसाईं पक्राउका लागि प्रहरी खटिएको छ ।

सरकारले प्रसाईंलाई पक्राउ गर्न आदेश दिएसँगै उनलाई पक्राउका लागि प्रहरी परिचालन भएको काठमाडौं प्रहरी परिसरका प्रमुख एसएसपी विश्व अधिकारले बताए ।

‘भिडलाई उक्साएर अराजकता मच्चाउने र तोडफोडमा उक्साउने कार्यमा जिम्मेवार ठहर गर्दै दुर्गा प्रसाईंलाई पक्राउ गर्ने सरकारको आदेश छ । उनलाई पक्राउ गर्न प्रहरी खटिएको छ,’ उनले भने ।

आन्दोलनको अघिल्लो दिन केही व्यक्तिमाझ प्रसाईंले आन्दोलनमा दमन गर्ने अवस्था ल्याउने र मान्छे मर्ने स्थिति आउने भन्दै बोलेका थिए ।  सरकारले पूर्वराजा र प्रसाईंलाई आजको तोडफोड, आगजनी र लुटपाटमा जिम्मेवार ठहर गरेको छ ।