सुस्ताएको हैदराबादलाई घरेलु मैदानमै गुजरातको चुनौती

काठमाडौं । आईपीएल (IPL) २०२५ को १९औं खेलमा आज सनराइजर्स हैदराबादले गुजरात टाइटन्सको सामना गर्दैछ ।

खेल हैदराबादको घरेलु मैदान राजीव गान्धी अन्तर्राष्ट्रिय रङ्गशालामा नेपाली समयअनुसार साँझ ७:४५ बजेदेखि सुरु हुनेछ ।

यस सिजनमा यो हैदराबादको पाँचौं र गुजरातको चौथो खेल हो । पहिलो खेलमा हैदराबादको टोलीले राजस्थान रोयल्स (आरआर) लाई ४४ रनले पराजित गरेको थियो । तर, त्यसयता टोलीले लगातार ३ खेल हारेको छ ।

अर्कोतर्फ गुजरात टाइटन्सले जितको ह्याट्रिक गर्ने लक्ष्य राख्नेछ । पञ्जाब किङ्ग्स विरुद्धको हारबाट आफ्नो अभियान सुरु गरेको गुजरातले आफ्नो दोस्रो खेलमा मुम्बई इन्डियन्स (एमआई) र तेस्रो खेलमा रोयल च्यालेन्जर्स बैङ्गलोर (आरसीबी) लाई हराउन सफल भयो ।

हेड टु हेडमा गुजरात अगाडि

हालसम्म हैदराबाद र गुजरातबीच ५ वटा खेल भइसकेका छन् । जसमध्ये ३ वटा गुजरातले जितेको थियो भने १ वटा मात्र हैदराबादले जितेको थियो । जबकि एउटा खेल वर्षाका कारण रद्द भयो ।

दुई टोलीबीचको पछिल्ला तीन खेलमा गुजरातले जित हासिल गरेको छ । साथै, दुवै टोली राजीव गान्धी अन्तर्राष्ट्रिय रङ्गशालामा दोस्रो पटक आमनेसामने हुनेछन् ।

SRH का केही खेलाडीहरूले राम्रो प्रदर्शन गरेका छन् । ब्याट्सम्यान ट्राभिस हेड ४ खेलमा १४० रन बनाएर टोलीको सर्वाधिक स्कोरर हुन् । सिजनको दोस्रो खेल र SRH को पहिलो खेलमा उनले ३१ बलमा ६७ रनको अर्धशतक बनाएका थिए । उनीबाहेक अनिकेत वर्माले पनि दिल्ली क्यापिटल्स विरुद्ध ७४ रनको इनिङ खेलेका थिए ।

हैदराबादका लागि अहिलेसम्म हर्षल पटेल र जीशान अन्सारीले सर्वाधिक विकेट लिएका छन् । दुवैले अहिलेसम्म ४-४ विकेट लिएका छन् ।

यता, गुजरात टाइटन्सका ब्याट्सम्यान साई सुदर्शन टोलीका सर्वाधिक स्कोरर हुन् । उनले ३ खेलमा कुल १८६ रन बनाएका छन् । सुदर्शनले यस सिजनमा अहिलेसम्म २ अर्धशतक बनाएका छन् । आफ्नो पहिलो खेलमा उनले पञ्जाब किङ्ग्सविरुद्ध ७४ रनको अर्धशतक बनाए । उनले दोस्रो खेलमा मुम्बई इन्डियन्स विरुद्ध ६३ रन बनाए ।

दोस्रो नम्बरमा जोस बटलर छन्, उनले ३ खेलमा जम्मा १६६ रन बनाएका छन् । उनले पछिल्लो खेलमा आरसीबी विरुद्ध ३९ बलमा ७३ रनको अविजित इनिङ खेलेका थिए । अघिल्लो खेलमा पनि उनले ५४ रन बनाएर अर्धशतक बनाएका थिए ।

बलरहरूमा साई किशोर शीर्ष स्थानमा छन् । उनले ३ खेलमा जम्मा ६ विकेट लिएका छन् । उनले पञ्जाब किङ्ग्सविरुद्ध ३० रन खर्चेर ३ विकेट लिएका थिए ।

पिच रिपोर्ट

राजीव गान्धी अन्तर्राष्ट्रिय रङ्गशालाको पिच ब्याटिङमैत्री छ । यहाँ उच्च स्कोरिङ खेलहरू देखिन्छन् । यस रङ्गशालामा हालसम्म ७९ वटा आईपीएल खेलहरू खेलिएका छन्, जसमध्ये ३५ खेल पहिले ब्याटिङ गर्ने टोलीले जितेका छन् भने ४४ खेल पछ्याउने टोलीले जितेका छन् । यहाँको उच्चतम टोली स्कोर २८६/६ हो, जुन हैदराबादले यस वर्ष राजस्थान रोयल्सविरुद्ध बनाएको थियो ।

सम्भावित प्लेइङ-१२

गुजरात : शुभमन गिल (कप्तान), साई सुदर्शन, जोस बटलर, शाहरुख खान, राहुल तेवाटिया, अरशद खान, राशिद खान, साई किशोर, मोहम्मद सिराज, प्रसिद कृष्ण, इशान्त शर्मा, शेरफान रदरफोर्ड ।

हैदराबाद : प्याट कमिन्स (कप्तान), अभिषेक शर्मा, इशान किशन, नितिश कुमार रेड्डी, हेनरिक क्लासेन (विकेटकिपर), अनिकेत वर्मा, कामिन्दु मेन्डिस, सिमरजीत सिंह, जीशान अन्सारी, हर्षल पटेल र मोहम्मद शामी, ट्राभिस हेड ।