चीनले बनायो गैरपरमाणु हाइड्रोजन बम

काठमाडौं । चिनियाँ वैज्ञानिकहरूले नयाँ हतियार बनाएका छन् ।

उक्त नयाँ हतियार गैर-परमाणु हाइड्रोजन बम हो, जसको अर्थ यो परमाणु सामग्रीबिना नै बनाइएको हो ।

चिनियाँ अनुसन्धानकर्ताहरूले हाइड्रोजन-आधारित विस्फोटक उपकरणको सफलतापूर्वक परीक्षण गरेर यो सफलता हासिल गरेको अन्तर्राष्ट्रिस सञ्चारमाध्यमले जनाएका छन् ।

गत महिना प्रकाशित एक अध्ययनमा यो जानकारी दिइएको हो । यो हाइड्रोजन बम चाइना स्टेट शिपबिल्डिङ कर्पोरेशन (CSSC) को ७०५ रिसर्च इन्स्टिच्युटले बनाएको हो । यो संस्थान पानीमुनि प्रयोग हुने हतियार निर्माणका लागि परिचित छ ।

साउथ चाइना मर्निङ पोस्टको रिपोर्टअनुसार परीक्षणको क्रममा दुई किलोग्राम (४.४ पाउण्ड) बमले १,००० डिग्री सेल्सियसको आगोको गोला सृजना गरेको थियो । यो आगोको गोला दुई सेकेन्डभन्दा बढी समयसम्म रह्यो ।

यो बम बनाउन कुनै पनि आणविक पदार्थ प्रयोग गरिएको छैन । यो बम म्याग्नेसियममा आधारित ठोस हाइड्रोजन भण्डारण सामग्रीबाट बनेको छ । यसलाई म्याग्नेसियम हाइड्राइड भनिन्छ । यो चाँदी रङ्गको पाउडर हो । यो पाउडरले प्रेसराइज्ड ट्याङ्कीभन्दा बढी हाइड्रोजन भण्डारण गर्न सक्छ ।

हाइड्रोजन बम किन विशेष ?

जर्नल अफ प्रोजेक्टाइल्स, रकेट्स, मिसाइल्स एण्ड गाइडेन्सले रिपोर्ट गरेको छ कि जब यो पाउडर (म्याग्नेसियम हाइड्राइड) लाई परम्परागत विस्फोटक पदार्थसँग प्रहार गरिन्छ, यो टुक्रिन्छ । यसबाट हाइड्रोजन ग्यास निस्कन्छ र ठूलो आगोको गोला बनाउँछ ।

“हाइड्रोजन ग्यास विस्फोटहरू धेरै कम ऊर्जाबाट सुरु हुन्छ,” CSSC वैज्ञानिक वाङ जुफेङको टोलीले भने । तिनीहरूको विस्फोट दायरा ठूलो छ । तिनीहरूको ज्वाला धेरै छिटो फैलिन्छ र टाढासम्म पुग्छ । यसले गर्दा विस्फोटको तीव्रता नियन्त्रण गर्न सकिन्छ । यसबाट, ठूला क्षेत्रहरूमा रहेका लक्ष्यहरूलाई सजिलै नष्ट गर्न सकिन्छ ।

वैज्ञानिकहरूका अनुसार यो हाइड्रोजन बमले धेरै गर्मी उत्पन्न गर्न सक्छ । किनभने यसबाट निस्कने आगोको गोला धेरै तातो हुन्छ । यो यति तातो छ कि यसले आल्मुनियम पनि पगाल्न सक्छ । यो TNT विस्फोट भन्दा धेरै लामो समयसम्म टिक्छ । TNT फायरबल केवल ०.१२ सेकेन्ड टिक्छ, जबकि परीक्षणमा यो हाइड्रोजन बम फायरबल दुई सेकेन्डसम्म टिक्यो ।

यस वर्षको सुरुमा चीनले शान्सी प्रान्तमा म्याग्नेसियम हाइड्राइड प्लान्ट खोलेको थियो । यो प्लान्टले प्रति वर्ष १५० टन म्याग्नेसियम हाइड्राइड उत्पादन गर्न सक्छ । यस प्लान्टले एक-भाँडो संश्लेषण विधि प्रयोग गरेर उत्पादन लागत घटाएको छ ।