‘आगामी आर्थिक वर्षदेखि बीमा क्षेत्रको एकीकृत निर्देशन कार्यान्वयनमा ल्याउँछौँ’- अध्यक्ष ओझा 

काठमाडौँ । नेपाल बीमा प्राधिकरणका अध्यक्ष शरद ओझाले बीमा क्षेत्रको एकीकृत निर्देशन जारी गर्ने क्रममा रहेको बताएका छन् । नेपाल बीमा प्राधिकरणको ५७औँ वार्षिकोत्सवमा आयोजित कार्यक्रममा बोल्दै उनले यस्तो बताएका हुन् । 

उनले छरिएर रहेका विभिन्न निर्देशन तथा निर्देशिकाहरूले कार्यान्वयनमा पारेको जटिलताका कारण ती अस्पष्टतालाई चिर्न छरिएर रहेका निर्देशनहरूलाई एकीकृत गरी बीमा क्षेत्रको एकीकृत निर्देशन जारी गर्न लागिएको बताएका छन् ।

बिमक र बीमा प्राधिकरणभित्र पनि छरिएर रहेका निर्देशनका कारणले प्रभावकारी नियमन र सुपरीवेक्षणलाई चुस्तता दिन नसकेको अध्यक्ष ओझाको भनाई छ । उनले उक्त एकीकृत निर्देशनलाई आगामी आर्थिक वर्षको साउनदेखि नै कार्यान्वयन गर्ने लक्ष्यका साथ काम भइरहेको जिकिर गरेका छन् । 

त्यस्तै, एकीकृत निर्देशनले बीमा क्षेत्रलाई विधि पालन गराउनमा अझ प्रभावकारी रूपमा सहयोग गर्ने अध्यक्ष ओझाले अपेक्षा राखेका छन् । उनले बीमा क्षेत्रको नियमन र नीति कार्यान्वयनमा उक्त एकीकृत निर्देशनले प्रभावकारी भूमिका खेल्ने विश्वास समेत व्यक्त गरेका छन् ।