इजरायलद्वारा इरानको सरकारी टेलिभिजन मुख्यालयमा बमबारी, इरानले दियो ‘युद्ध अपराध’ को संज्ञा

तेहरान । इजरायली विमानहरूले इरानको सरकारी प्रसारण संस्थाको तेहरानस्थित मुख्यालयमा आक्रमण गरेका छन्। यसअघि इजरायली सेनाले  त्यहाँका बासिन्दाहरूलाई तत्काल खाली गर्न चेतावनी दिएको थियो।

इस्लामिक रिपब्लिक अफ इरान ब्रोडकास्टिङ (IRIB) को टिभी च्यानलमा भइरहेको प्रत्यक्ष प्रसारण विस्फोटको आवाज सुनिएपछि र स्टुडियोको बत्ती निभेकोले केही समयका लागि अवरुद्ध भएको थियो। इरानी सञ्चारमाध्यमले कम्तीमा एक कर्मचारीको मृत्यु भएको जनाएका छन्।

इजरायली सेनाले  “इरानी शासनको सञ्चार केन्द्र” लाई निशाना बनाएको बताएको छ भने इरानको विदेश मन्त्रालयले उक्त आक्रमणलाई  “युद्ध अपराध” को संज्ञा दिएको छ।

पछि, IRIB का प्रमुख पेमान जेबेली टिभीमा देखा परे, जसमा रगतले लतपतिएको कागज देखाइएको थियो। उनले च्यानल र यसका कर्मचारीहरू “अन्तिमसम्म डटेर बस्ने” बताए। अर्ध-सरकारी फार्स समाचार एजेन्सीले आक्रमणमा IRIB सचिवालयका कर्मचारी मासुमेह अजिमीको मृत्यु भएको जनाएको छ।

इरानका विदेश मन्त्रालयका प्रवक्ता इस्माइल बाकाईले उक्त आक्रमणको निन्दा गर्दै यसलाई “दुष्ट कार्य” र “युद्ध अपराध” भनेका छन्।

यसैबीच, तेहरानका बासिन्दाहरू ठूलो संख्यामा शहर छोडेर भागिरहेको देखिएको छ, उत्तरी भागमा जाने एउटा राजमार्गमा सवारी जाम भएको तस्वीरहरूले देखाएका छन्।

इरानको स्वास्थ्य मन्त्रालयका अनुसार  शुक्रबारयता इजरायली हवाई आक्रमणमा कम्तीमा २२४ जनाको मृत्यु भएको छ भने १,२०० भन्दा बढी घाइते भएका छन्।

सोही अवधिमा इरानी क्षेप्यास्त्र आक्रमणबाट इजरायलमा कम्तीमा २४ जनाको मृत्यु भएको र ५९२ जना घाइते भएको इजरायली प्रधानमन्त्रीको कार्यालयले जनाएको छ। (बीबीसीबाट)