समाजवादी मोर्चाबारे छलफल गर्न बालुवाटारमा बैठक जारी

काठमाडौँ । समाजवादी मोर्चाबारे छलफल गर्न प्रधानमन्त्री निवास बालुवाटारमा बैठक बसिरहेको छ । बैठकमा नेकपा माओवादी केन्द्र, जनता समाजवादी पार्टी, नेकपा (एकीकृत समाजवादी) र विप्लव नेतृत्वको नेकपा सहभागी रहेको बताइएको छ । 

समाजवादी मोर्चा घोषणाका विषयमा  छलफल गर्न प्रधानमन्त्री पुष्पकमल दाहाल ‘प्रचण्ड’, जसपा अध्यक्ष उपेन्द्र यादव, एकीकृत समाजवादीका अध्यक्ष माधवकुमार नेपाल र नेकपा महासचिव नेत्रविक्रम चन्द विप्लवबीच छलफल जारी छ । 

समाजवादी मोर्चामा नेपाल समाजवादी पार्टीका अध्यक्ष बाबुराम भट्टराई र नेकपा एकता अभियानका संयोजक वामदेव गौतमलाई समेट्ने विषयमा छलफल हुने बताइएको छ ।  

समाजवादी मोर्चाको ड्राफ्ट तयार गर्न माओवादी प्रवक्ता कृष्णबहादुर महरा, जसपा नेता राजेन्द्र श्रेष्ठ र एकीकृत समाजवादीका नेता राजेन्द्र पाण्डेलाई जिम्मेवारी दिएको छ ।