झापाको बिरिङ खोला किनारमा मानव कंकाल फेला, चार जना प्रहरी नियन्त्रणमा

बनियानी, २० असोज । झापाको बाह्रदशी गाउँपालिका–७ स्थित बिरिङ खोलाको किनारमा गाडिएको अवस्थामा मानव कंकाल फेला परेको छ ।

आज बाह्रदशी–७ बिरिङ खोलाको पश्चिम किनारमा गडिएको अवस्थामा टाउको हड्डी, खुट्टाको नली हड्डी, शरीरको अस्थिपञ्जर सडेगलेको अवस्थामा फेला परेको जिल्ला प्रहरी कार्यालय झापाका प्रवक्ता प्रहरी नायब उपरीक्षक कृष्णकुमार चन्दले जानकारी दिनुभयो ।

गत जेठ १५ गते बाह्रदशी–५ फुलाबारीका भीम हजामको २२ वर्षीय राजेश हजाम कसैलाई नसोधी घरबाट हिँडेका थिए । उनी सम्पर्कविहीन भएपछि उनका बुबा भीमले इलाका प्रहरी कार्यालय अनारमनीमा जेठ १८ गते हुलिया निवेदन दिएका थिए ।

उनको खोज गर्नेक्रममा राजेशको हत्या भएको हुनसक्ने विषेश सूचान असोज १७ गते प्रहरीलाई प्राप्त भएका प्रवक्ता चन्दले बताउनुभयो । असोज १८ गते शंकास्पद चार जनलाई प्रहरीले नियन्त्रणमा लिएको थियो ।

प्रहरीले घटनामा संलग्न भएको आशंकामा बाह्रदशी–७ का ३१ वर्षीय समिर राजवंशी, २१ को आशिष थापा, २० वर्षीया मुना मेचे (राजवंशी) र १६ वर्षीय नरेश राजबंशीलाई नियन्त्रणमा लिएको छ ।

बिरिङ खोला किनारमा भेटिएको शव राजेशकै भएको उनका परिवारले सनाखत गरेको प्रहरीले जनाएको छ । घटनाका विषयमा थप अनुसन्धान भइरहेको जिल्ला प्रहरी कार्यालय झापाले जनाएको छ ।

The post झापाको बिरिङ खोला किनारमा मानव कंकाल फेला, चार जना प्रहरी नियन्त्रणमा appeared first on Jhapa Online.