बिरिङ खोलामा बन्यो फलामे पुल : झापा र बाह्रदशीको सम्पर्क जोडियो

सन्तोष शर्मा
बनियानी, २५ असोज । झापाको झापा गाउँपालिका–५ स्थित बिरिङ खोलामा फलामे पुल निर्माण भएको छ ।

गत असोज ११ गते अविरल वर्षासँगै खोलामा आएको बाढीले पुलको दक्षिणतर्फको करिब २४ मिटर सडक बाढीले बगाएको थियो । बाढीले सडक बगाएपछि सो स्थानमा अस्थायी फलामे पुल निर्माण गरिएको छ ।

चाडपर्वका बेलामा आवागतमा ठप्प भएपछि स्थायी फलामे पुल निर्माण गरिएको समाजिक व्यक्तित्व शेरबहादुर थापाले बताउनुभयो । “तत्कालको समस्या समाधान गर्न सबैको सहयोगबाट पुल बनेको छ”, पुल निर्माणमा विशेष पहल र अगुवाइ गर्नुभएका उहाँले भन्नुभयो, “चाडपर्वका बेला आवागमन ठप्प हुँदा स्थानीयबासी समस्यामा परेका थिए ।”

सम्बन्धित सरकारी निकायबाट अनुमति लिएर काम गरिएको उहाँले बताउनुभयो । “तत्कालका लागि हामीले आफ्नै गोजीको खर्च गरेर काम गरेका छौं”, उहाँले भन्नुभयो, “सम्बन्धित निकायबाट खर्च व्यवस्थापन हुने आश्वासन आएको छ ।”

बाढीले सडक बगाउँदा दुई पालिकाबीचको सम्पर्कविच्छेद भएको झापा गाउँपालिका–५ का वडाध्यक्ष कृष्ण राजवंशीले बताउनुभयो । “झण्डै ४० हजार मानिसको आवतजावत दैनिकमा असर परेको थियो”, उहाँले भन्नुभयो, “सबैको सहयोगले पुल बनेको छ, स्थानीयबासीलाई राहत मिलेको छ ।”

सडक अवरुद्ध हुँदा सदरमुकाम पुग्न करिब ६५ किलोमिटर यात्रा गर्नुपर्ने बाध्यता रहेको बताउँदै उहाँले भन्नुभयो, “अवरोध हटेपछि २० किलोमिटर यात्रा गर्दा सदरमुकाम पुगिन्छ ।” सो पुलबाट पैदलयात्री, साइकल, मोटरसाइकल र अटोमा आवतजावत गर्न सकिन्छ ।

फलामे पुलको चौडाइ ६.५ फिट र लम्बाइ २४.५ मिटर रहेको छ । पुल निर्माणमा रू तीन लाख खर्च भएको छ भने स्थानीयबासीले श्रमदान समेत गरेका छन् ।

पुल निर्माण भएपछि स्थानीयबासी खुसी भएका छन् । झापा–५ निवासी शम्भूप्रसाद राजवंशीले पुल निर्माण पछि ठूलो राहत मिलेको बताउनुभयो । उहाँले मानिसको आतजावत सहज भए पनि ठूला सवारी साधान आउन नसक्ने भएकाले कृषकहरु अझै मर्कामै रहेको बताउनुभयो । तत्काल सडक निर्माण गर्न उनीहरुले सम्बद्ध निकाय समक्ष मागसमेत गरेका छन् ।

The post बिरिङ खोलामा बन्यो फलामे पुल : झापा र बाह्रदशीको सम्पर्क जोडियो appeared first on Jhapa Online.