२ लाख नदिए उद्योगमा बम हान्ने धम्की, पक्राउ परेपछि थाहा भयो आफ्नै मजदुर !

काठमाडौं । कागेश्वरी मनहरा नगरपालिका–८ मा रहेको सिसुवान याङ टेक्टटायल प्रालि कपडा उद्योगको म्यानेजरलाई २ लाख रुपैयाँ माग गर्दै म्यासेज आयो । २ दिनभित्र नदिएर उद्योग बमले हानेर उठाउने धम्की थियो ।

२१ असोजको राति ८ः४० बजे आएको म्यासेज थियो ‘हाम्रो पार्टीलाई डेढेदेखि २ लाख सहयोग गर्नुस् । रकम लिएर नुवाकोटमा भेट्न आउनु । नत्र बम विस्फोट गरेर कम्पनी उडाइदिन्छु ।’

चिनियाँ नागरिकले सञ्चालन गरेको उत्त कम्पनीकी म्यानेजर नेपाली महिला मिङवुती शेर्पा प्रहरीमा गइन् ।

धम्की आएको मोबाइल नम्बरसहित उजुरी दिइन् । तर, त्यतिबेला उक्त नम्बर स्विच अफ भइसकेको थियो । त्यसको करिब एक सातापछि फेरि अर्को नयाँ नम्बरबाट शेर्पाकै मोबाइल नम्बरमा अर्को म्यासेज आयो ।

‘तँ प्रहरीमा समेत गइस् हैन ? पैसा नदिई प्रहरीमा खबर गरिस् हैन ? अब प्रहरीलाई भनिस् भने राम्रो हुनेछैन’ भन्दै अर्काे म्यासेज आयो ।

धम्कीका कारण म्यानेजर त्रासमै बसिन् । उद्योग समेत त्रासमै चल्यो ।

काठमाडौं उपत्यका अपराध अनुसन्धान कार्यालयका प्रहरी धम्की दिनेको खोजीको लागि जुट्यो । अपराध अनुसन्धान कार्यालयका डीएसपी रोशन खड्काको टोलीले अनुसन्धान जारी राख्यो ।

केही दिनपछि धम्की दिने व्यक्ति गिरफ्तार भएको सूचना प्रहरी कार्यालयबाट आयो । उनको परिचयले सबैलाई चकित पारिदियो । धम्की दिने व्यक्ति उद्योगमा मजदुरी गर्ने व्यक्ति नै थिए ।

एसएमएस मार्फत धाकधम्की दिई पैसा माग्ने व्यक्ति थिए, सिन्धुपाल्चोक ज्यामिरे गाविस–८ घर भई हाल काठमाडौं कागेश्वरी मनोहरा ८ बस्ने ३२ वर्षीय पदम भन्ने आकाश तामाङ ।

पक्राउ परेका ती कामदारविरुद्ध सोमबार काठमाडौं जिल्ला अदालतमा आपराधिक लाभको कसुरमा मुद्दा दायर भयो ।

मंगलबार काठमाडौं जिल्ला अदालतका न्यायाधीश खेमराज भट्टको इजलासले उनलाई धरौटीमा छाडेको छ ।