अन्तर्राष्ट्रिय वज्र मार्सल आर्ट्स प्रतियोगिताको सुपर हेभीवेटमा सन्देशलाई स्वर्ण

काठमाडौं । नेपालका सन्देश मानन्धरले प्रथम अन्तर्राष्ट्रिय वज्र मार्सल आर्ट्स प्रतियोगिताको पुरुष सुपर हेभीवेट ९० केजी माथिमा स्वर्णपदक जितेका छन् ।

त्रिपुरेश्वरस्थित राष्ट्रिय खेलकुद परिषद्को कभर्ड हलमा भएको फाइनलमा सन्देशले सरोज श्रेष्ठलाई पराजित गर्दै स्वर्ण जितेका हुन् । पुरुष ५५ केजीमुनि नेपालका प्रवीण माझीले भारतका सुजय गोरेनलाई हराउँदै स्वर्ण जितेका छन् ।

नेपाल क्योकुसिन कराते डो संघ वज्रको आयोजनामा भएको प्रतियोगिताको पुरुष ६२ केजीमुनि नेपालका सुजित गुरुङले नेपालका मनीष कार्की, ६९ केजीमुनि नेपालका सनी सिंहले नेपालका आकाश श्रेष्ठ, ७६ केजीमुनि नेपालका विकास गुरुङले नेपालका शिव भुजेल, ८३ केजीमुनि नेपालका महेन्द्र विकले नेपालका रविन्द्र लुहार र ९० केजीमुनि नेपालका अनुजकुमार सिंहले नेपालका विशाल सुनारलाई फाइनलमा पाखा लगाउँदै शीर्ष स्थानमा रहे ।

महिला ४६ केजीमुनि नेपालकी अस्मिता तामाङले नेपालकी रश्मी श्रेष्ठलाई, ५१ केजीमुनि सपना आलेले सुहानी महर्जनलाई, ५६ केजीमुनि शान्ति थापा मगरले बविता कार्कीलाई, ६१ केजीमुनि अप्सरा कुमालले भारतकी सोनाम ल्हामो दर्जीलाई र ७१ केजीमुनि सपना ऐडीले सिमा घिसिङलाई पन्छ्याउदै स्वर्ण जितेका छन् ।

विजेतालाई पूर्वमेयर राजाराम श्रेष्ठ, आयोजक संघका अध्यक्ष जगतप्रसाद गौचन, वरिष्ठ उपाध्यक्ष पुष्प मानन्धरलगायतले एक कार्यक्रमबीच पुरस्कृत गरे । पदक विजेतालाई नगदसहित पुरस्कृत गरिएको थियो ।

दुईदिने प्रतियोगितामा नेपालका ३६ र भारतका ५ गरी ४१ खेलाडीको सहभागिता रहेको थियो ।